யுவனின் இசைக்கு பெருமை சேர்க்கும் விஜய் டி.வி.

இசையமைப்பாளராக திரைத்துறைக்குள் நுழைந்து 13 ஆண்டுகளை கடந்து விட்ட யுவன் சங்கர் ராஜா இதுவரை 75 படங்களுக்கு இசையமைத்து விட்டார். அதில் நிறைய படங்கள் வெற்றிப்படங்களாக அமைந்திருப்பது யுவனுக்கும், அவரது ரசிகர்களுக்கும் பெருமை சேர்க்கின்ற விஷயம்.

இந்த பெருமைக்கு பெருமை சேர்க்கும் வகையில், விஜய் டி.வி., `யுவன் இசை ராஜா என்ற தலைப்பில் திங்கள் முதல் வெள்ளிவரை தினமும் இரவு 8 மணிக்கு புதிய இசை நிகழ்ச்சியை ஒளிபரப்பு செய்து வருகிறது.

இந்த நிகழ்ச்சியின் முதல் வாய்ப்பாக வருகிற 16ம்தேதி சென்னை நந்தனம் ஒய்.எம்.சி.ஏ. அரங்கில் பிரமாண்ட இசை நிகழ்ச்சி ஒன்றை வழங்க முன்வந்திருக்கிறார் யுவன். நிகழ்ச்சிக்கான முன்னோட்ட பாடலாக யுவன் இசையமைத்துப் பாடிய `ஐ வில் பி தேர் பார் யு என்ற பாடல் விஜய் டிவியால் பிரத்யேகமாக படமாக்கப் பட்டுள்ளது.

இந்த பாடலுக்கான காட்சியை டைரக்டர் விஷ்ணுவர்த்தன் இயக்கினார். பாடகர்கள் சங்கர் மகா தேவன், ஸ்ரேயா கோஷல், கார்த்திக், ஹரிஷ் ராகவேந்திரா, ஆண்ட்ரியா, ராகுல் நம்பியார், விஜய் ஏசுதாஸ், தன்விஷா, சுவி, மதுமிதா, பேலா ஷெண்டே ஆகியோர் நிகழ்ச்சியில் யுவனின் `சூப்பர்ஹிட் பாடல்களை பாடுகிறார்கள்.

நிகழ்ச்சியின் ஹைலைட்டாக மகன் யுவனுடன் இணைந்து ஒரு இசை விருந்தைப் படைக்கவுள்ளார், இளையராஜா.

வெளிநாடுகளில் மட்டுமே இசை நிகழ்ச்சி நடத்தி வந்த யுவன், சென்னையில் முதன் முதலாக நடத்தும் இசை நிகழ்ச்சி இது என்பது கூடுதல் தகவல்.