சினிமாவுக்கு குட்பை : விடைபெறும் ஷம்மு

காஞ்சிவரம் படம் மூலம் தமிழுக்கு அறிமுகமானவர் நடிகை ஷம்மு. இவர் மலையன், மாத்தியோசி படங்களில் கதாநாயகியாகவும் நடித்துள்ளார்.

இவர் தற்போது நடித்துள்ள மயிலு, பாலை படங்கள் முடிவடைந்து ரிலீசுக்கு தயாராக உள்ளன. இந்நிலையில் ஷம்மு சினிமாவுக்கு முழுக்கு போட்டுவிட்டு மருத்துவ படிப்பை தொடர அமெரிக்க செல்வதாக கூறியுள்ளார்.

இதுகுறித்து ஷம்மு கூறியதாவது:

நான் பிறந்து, வளர்ந்து, படித்தது எல்லாம் அமெரிக்காதான். ஆனால் அடிப்படையில் நான் ஒரு தமிழ் பெண். சினிமாவில் நடிக்க வேண்டும் என்ற ஆசையில் டாக்டர் படிப்பை பாதியிலேயே நிறுத்திவிட்டு சென்னைக்கு வந்துவிட்டேன்.

அமெரிக்காவின் புளோரிடா மாகாணத்தில் உள்ள யுனிவர்சிட்டி ஆஃப் சென்ட்ரல் புளோரிடா பல்கலைக்கழகத்தில் மருத்துவ படிப்பை மீண்டும் தொடரை இருக்கிறேன்.

நான் சினிமாவுக்கு வந்து தற்செயலான ஒரு நிகழ்வு. எனக்கு பல நல்ல வாய்ப்புகள் கிடைத்தன. தேசிய விருது பெற்ற காஞ்சிவரம் படத்தில் முக்கியமான கதாபாத்திரத்தில் நடித்தது பெருமையாக இருக்கிறது.

மீண்டும் சினிமாவுக்கு வருவேனா? என்பதை காலம்தான் முடிவு செய்ய வேண்டும் என்றார்.