பப்ளிக்கில் பிளையிங் கிஸ்…நமீதா செயலால் சேரன் அலுப்பு

சுமார் 25 ஆண்டுகளுக்கு பிறகு வரும் முழுமையான 3டி திரைப்படம் அம்புலி. மைடியர் குட்டி சாத்தான் படத்தில் கூட சில காட்சிகள் மட்டுமே 3டி தொழில் நுட்பத்தில் அமைக்கப்பட்டிருக்கும். ஆனால் அம்புலியில் எல்லா காட்சிகளையும் முப்பரிமாணத்தில் அமைத்திருக்கிறார்கள் இரட்டை இயக்குனர்களான ஹரி ஷங்கர், மற்றும் ஹரிஷ் நாராயணன் இருவரும்.

இப்படத்தின் பாடல் வெளியீட்டு விழா காமராஜர் அரங்கத்தில் நடந்தது. விழாவில் பேசிய பார்த்திபன், இப்போதெல்லாம் திருடி படமெடுக்கிறவர்களின் எண்ணிக்கை பெருகிவிட்டது. அண்மையில் வெளிவந்த இந்தியா டுடே வார இதழில் கொரியன் மற்றும் ஹாலிவுட் படங்களில் இருந்து திருடப்பட்ட படங்களின் பெயரை வெளியிட்டிருந்தார்கள். அப்படி திருடி படமெடுப்பவர்கள் மத்தியில் 3டி படம் எடுக்க வந்த லோகநாதனை பாராட்டுகிறேன் என்றார் தனக்கேயுரிய தனித்தன்மையோடு.

விழாவில் கலந்து கொண்ட இன்னொரு விஐபியான தயாரிப்பாளர் கேயார், நான் 1984 ம் வருடத்தில் மை டியர் குட்டிசாத்தான் படத்தை உருவாக்கினேன். அது ஓன்றேகால் வருடம் ஓடி சாதனை படைத்தது. படம் எடுத்துக் கொண்டிருக்கும் போது எல்லாரும் என்னை பைத்தியக்காரன் என்றார்கள். ஆனால் அப்படம் வசூலில் பெரிய சாதனை படைத்தது. மக்கள் குடும்பம் குடும்பமாக தியேட்டருக்கு வந்தார்கள். அதன் பின் அந்த டெக்னாலஜியை பயன்படுத்தி ஏராளமான படங்கள் தமிழில் வந்திருக்க வேண்டும். யாருமே தங்கள் தொழில் நுட்ப அறிவை வளர்த்துக் கொள்வதில் ஆர்வம் காட்டததால் மீண்டும் ஒரு 3டி படம் வர இருபத்தைந்து வருடம் காத்திருக்க வேண்டியதாகிவிட்டது என்றார்.

விழாவுக்கு நடிகை நமீதாவும் வந்திருந்தார். மச்சான்ஸ் என்று ரசிகர்களை அழைத்து குஷியேற்றியவர் அனைவருக்கும் பிளையிங் கிஸ் கொடுக்க, அரங்கமே ஜில்லானது.

அவருக்கு பின் பேசவந்த சேரன், இங்க நமீதா வந்தாங்க. இவ்வளவு பப்ளிக்கான மேடையில எல்லாருக்கும் கிஸ் கொடுத்தாங்க. நியாயமா நம்ப வீட்டு பொண்ணுங்க இப்படி மேடையில் வந்து கிஸ் கொடுத்தா ரசிப்போமா? ஆனால் அவங்க கொடுக்கும் போது எல்லாரும் ரசிச்சீங்க. மக்களோட மனசு மாறிடுச்சு. நாமும் அதற்கேற்ப மாறிக் கொள்ள வேண்டியதுதான் என்றார் மிகவும் கவலையாக.