175-வது நாளில் காலடி எடுத்து வைத்திருக்கும் ‘கோ’

கே.வி.ஆனந்தின் இயக்கத்தில் கடந்த ஏப்ரல் 22 அன்று வெளியான ‘கோ’திரைப்படம் இன்று தனது 175-வது நாளில் காலடி எடுத்து வைக்கிறது. இப்படத்தில் நடிகர் ஜீவா பத்திரிகை புகைப்படக்காரராகவும், அஜ்மல் மாணவராக இருந்து அரசியல்வாதியாகவும், முன்னாள் நடிகை ராதாவின் மகளான கார்த்திகாவும், பியா பாஜ்பாயும் பத்திரிகை நிருபர்களாகவும் நடித்திருப்பார்கள்.

தமிழில் இப்படம் அபார வெற்றி பெறவே, இப்படம் வெளியான அடுத்த ஒரு வாரத்தில் அப்படியே தெலுங்கில் டப் செய்து ‘ரங்கம்’ என்ற பெயரில் திரையிட்டார்கள். அங்கும் இப்படம் வசூலை வாரிக் குவித்தது. இப்படம் நடிகர் ஜீவாவிற்கு ஒரு நட்சத்திர அந்தஸ்தை வழங்கியிருக்கிறது.

நடிக்ர அஜ்மலுக்கும் இப்படம் மறுவாழ்வு கொடுத்திருக்கிறது. கே.வி.ஆனந்தின் இயக்கமும், ஹாரிஸ் ஜெயராஜின் இசையும், ரிச்சர்டு கே நாதனின் ஒளிப்பதிவும் இப்படத்திற்கு முக்கிய பலம் என்று சொன்னால் அது மிகையாகாது. இப்படத்தை விரைவில் ஹிந்தியில் ரீமேக் செய்ய இருக்கிறார்கள்.