வித்யாபாலன் வழியில் அனுஷ்கா…!

துணிச்சலான கேரக்டரில் நடிக்கும் வல்லமை கொண்டவர் நடிகை வித்யாபாலன். அதற்கு உதாரணம் சமீபத்தில் அவர் நடிப்பில் வெளியான தி டர்ட்டி பிக்சர்ஸ். ஆரம்பத்தில் இந்த கேரக்டரில் நடிக்க அவருக்கு கடும் எதிர்ப்பு கிளம்பியது. இருந்தும் துணிச்சலாக நடித்து வெற்றி பெற்றார். படமும் நன்றாக ஓடி வசூலை வாரி குவித்தது. மேலும் இப்படத்தில் நடித்ததற்காக அவருக்கு தேசிய விருதும் கிடைக்க இருக்கிறது. டர்ட்டி பிக்சர்ஸ் படத்திற்கு அடுத்து வித்யாபாலன் நடித்த கஹானி படமும் அவருக்கு பெரும் பாராட்டை பெற்று தந்தது. நிறைமாத கர்ப்பிணியாக தனது கணவரை தேடி இந்தியா வரும் வித்யாபாலன், எப்படியெல்லாம் கஷ்டப்பட்டு தனது கணவரை கண்டுபிடிக்கிறார் என்பது கதை.

இப்படி தொடர்ச்சியாக சவாலான வேடங்களில் நடித்து அனைவரையும் கவர்ந்து வரும் வித்யாபாலனை, அனுஷ்காவுக்கு ரொம்பவே பிடித்து போய்விட்டதாம். சமீபத்தில் அவரின் கஹானி படத்தை பார்த்து வியந்து போன அனுஷ்கா, இப்படத்தை யாராவது தமிழிலோ அல்லது தெலுங்கிலோ ரீ-மேக் செய்தால் அந்த கேரக்டரில் நானே நடிக்கிறேன் என்று தானாக முன்வந்து விருப்பம் தெரிவித்துள்ளார். ஏற்கனவே தி டர்ட்டி பிக்சர்ஸ் தமிழ், தெலுங்கு ரீ‌‌-மேக்கில் அனுஷ்கா நடிக்க இருப்பதாக ஒரு பேச்சு எழுந்தது குறிப்பிடத்தக்கது.