ரீமேக் படத்தில் தல – தளபதி?!

கத்திரி வெயிலை விட சூடாக இருக்கிறது கோடம்பாக்கம்! காரணம் தல – தளபதி சேர்ந்து நடிக்கப் போகிறார்களாமே என்ற ஹாட் டாபிக் பற்றிய சூடான விவாதம் தான். கே.பாலச்சந்தர் இயக்கத்தில், ரஜினி – கமல் இணைந்து நடித்து தமிழ் திரையுலகில் சக்கைப் போடு போட்ட “நினைத்தாலே இனிக்கும்” படம் ரீமேக் செய்யப்பட இருப்பதாகவும். அதில் அஜித் – விஜய் சேர்ந்து நடிப்பார்கள் என்றும் ஒரே பேச்சு.

அஜித்தை முதன்முதலில் அமராவதி படத்தில் அறிமுகப்படுத்திய செல்வா தான் இப்படத்தினை இயக்கப் போகிறார் என்றும் கூறப்படுகிறது. இதற்காக அஜித்திடம் பேசி ஒப்புதல் வாங்கி விட்ட செல்வா விரைவில் விஜய்யை நேரில் சந்தித்துப் பேசுவார் என்கிறது விவரமறிந்த வட்டாரம். அஜித் கமல்ஹாசன் கதாபாத்திரத்தில் நடிப்பார் என்கிறது கோடம்பாக்க பட்சி. ஆனால் இயக்குநர் செல்வாவோ , எப்படி இப்படி எல்லாம் செய்திகள் வெளியாகின்றன என எனக்கு வியப்பாக இருக்கிறது. நான் அஜித்தை சமீபத்தில் சந்திக்கவில்லை. இப்படி ஒரு ரீமேக் திட்டமும் என் மனதில் இல்லை என்கிறார்.

நெருப்பில்லாமல் புகையாது! எது உண்மையோ ஆண்டவனுக்கே வெளிச்சம்?!