வாங்க தலைவரே வாங்க!

வசந்த் தொலைக்காட்சியில் நாளை இரவு 7.30மணிக்கு ஒளிபரப்பாகும் அரசியல் நையாண்டித்தொடர், வாங்க தலைவரே வாங்க! ஜெயிலில் இருந்து சில கொடூர கைதிகளை தப்ப வைக்கும் ஒரு அரசியல் கும்பல், அவர்களை தங்கள் இருப்பிடம் அழைத்து சில அசைன்மென்ட்களை கொடுக்கிறது. அதில் இருக்கும் ஒரு குறிப்பிட்ட வேலை அவர்களையே அதிரப் பண்ணுகிறது. அரசியல்வாதியின் மனைவி தனது கணவரிடம் இருந்து பதவியை கைப்பற்றும்நோக்கில் சில அதிரடி முடிவுகளை எடுக்கிறாள். அந்த முடிவு எதற்கும் அஞ்சாத கைதிகளையே குலை நடுங்க வைக்கிறது. வேறு வழியில்லாமல் பணத்துக்காக இந்த திட்டத்துக்கு அவர்கள் உடன்பட்டாலும், அதன்பிறகு அவர்கள் அடியெடுத்து வைக்கும் ஒவ்வொரு ஸ்டெப்பிலும் கிடைக்கும் அனுபவம் அரசியல் இத்தனை மோசமானதா என்பதாக அதிர வைக்கிறது. ஒருவழியாக அந்த அரசியல் கும்பலில் இருந்து தப்பி நேராக காவல் நிலையம் செல்லும் அவர்கள், தப்பியோடியதற்கும் சேர்த்து ஜெயில் தண்டனைக்கு ஏற்பாடு செய்யும்படி கேட்டுக் கொள்கிறார்கள். ஜெயமணி எழுதி இயக்கும் இந்த தொடரில், பாண்டு, மஞ்சு ரவி, சுருளிமனோகர், பானுஸ்ரீ, ஷைலஜா ஆகியோர் நட்சத்திரங்கள்.