தயாரிப்பாளர்களுக்கு போதாத காலம்

ஏற்கனவே ஊதிய உயர்வு உள்ளிட்ட கோரிக்கைகளை வலியுறுத்தி சினிமா திரைப்பட தொழிலாளர்கள் மேற்கொண்ட வேலை நிறுத்தப் போராட்டம் காரணமாக பல சினிமா படப்பிடிப்புகள் தடைபட்டன. இதனால் தயாரிப்பாளர்களுக்கு பல லட்சம் நஷ்டம் ஏற்பட்டது.

இதையடுத்து தயாரிப்பாளர்கள் சங்கமும், தொழிலாளர்கள் சங்கமும் பேச்சுவார்த்தை நடத்தி சுமூகமான முடிவை எட்டினர். இதனால் படப்பிடிப்புகள் துவங்கி நடைபெற்றன.

இந்த நிலையில், பருத்திவீரன் பட விவகாரம் குறித்து இயக்குநர், தயாரிப்பாளர் மீது புகார் அளிக்க, அதனைத் தொடர்ந்து சினிமா தொழிலாளர்கள் வேலை செய்ய மறுக்க மீண்டும் பிரச்சினை தயாரிப்பாளர்கள் சங்கத்திற்கே சென்றது.

அவர்களும் ஒன்று கூடி முடிவெடுத்து மாநில தொழிலாளர் ஆணையத்திடம் புகார் அளித்தனர். உடனடியாக இதன் மீது நடவடிக்கை மேற்கொள்வதாக ஆணையரும் உறுதி அளித்துள்ள நிலையில், தொழிலாளர்களுக்கு ஆதரவாகவும் புகார் அளிக்க திட்டமிடப்பட்டுள்ளது.

எது எப்படியாக இருந்தாலும் கடனை உடனை வாங்கி, சொத்து பத்தை விற்று படம் எடுக்கும் தயாரிப்பாளர்களுக்கு இது போதாத காலம் போல.