கோடம்பாக்கத்தில் அறுபது ஆண்டுகள்

"பாசமலர்'', "புதிய பறவை'', "அன்பே வா'' உள்பட ஆயிரம் படங்களுக்கு மேல் திரைக்கதை, வசனம் எழுதி சாதனை படைத்தவர், ஆரூர்தாஸ். எம்.ஜி.ஆருக்கும், சிவாஜிக்கும் ஒரே சமயம் வசனம் எழுதியவர். சினிமா உலகில் அவர் அடியெடுத்து வைத்து 60 ஆண்டுகள் ஆகின்றன. திரை உலகில் அவருக்குள்ள நீண்ட கால அனுபவங்களை "கோடம்பாக்கத்தில் அறுபது ஆண்டுகள்'' என்ற தலைப்பில் புத்தகமாக எழுதியுள்ளார். பட அதிபர்கள், டைரக்டர்கள், நடிகர் - நடிகைகள் ஆகியோருடன் அவருக்கு ஏற்பட்ட அபூர்வமான அனுபவங்களை வாசகர்களுடன் பகிர்ந்து கொள்கிறார். சினிமா உலகின் மறுபக்கத்தையும் மறைக்காமல் சொல்கிறார். கதை - வசனம் எழுதுவதில் வெற்றி மேல் வெற்றி பெற்று வந்த சமயத்தில், ஒரே ஒரு படத்தை டைரக்ட் செய்யப்போய், அதில் ஏற்பட்ட சோதனையையும் சொல்கிறார். புத்தகம், ஒரு நாவலுக்கு உரிய விறுவிறுப்புடன் அமைந்துள்ளது. எல்லா தரப்பு ரசிகர்களையும் கவர்ந்து இழுக்கக்கூடிய புத்தகம்.