ஆயிரம் முத்தங்களுடன் தேன்மொழி வெளியீடு

இன்று திரைக்கு வந்துள்ள ஆயிரம் முத்தங்களுடன் தேன்மொழி படத்தை இயக்குநர் ஷண்முகராஜன் இயக்கியுள்ளார். இவர் சேரனின் உதவி இயக்குநராக இருந்தவர் என்பது குறிப்பிடத்தக்கது. இப்படத்தில் 71 புதிய முகங்கள் நடித்துள்ளனர்.

பெரிதாக இப்படத்தைப் பற்றி செய்திகள் எதுவும் வெளிவராத நிலையில், இன்று படம் வெளியாவதை முன்னிட்டு நேற்று படக் குழுவினர் உலக நாயகன் கமலஹாசனைச் சந்தித்து வாழ்த்துப் பெற்றனர்.

படப்பிடிப்பிற்கு முன்பு ஒத்திகைப் பார்க்க வேண்டும் என்ற கமலஹாசனின் கொள்கையைப் பின்பற்றி, ஆயிரம் முத்தங்களுடன் தேன்மொழி நடிகர்கள், சுமார் 372 நாட்கள் திருவண்ணாமலையில் ஒரு வீட்டை வாடகைக்குப் பிடித்து அதில் ஒத்திகைகளை செய்து முடித்து பிறகுதான் படப்பிடிப்பிற்கே கிளம்பியுள்ளனர் என்றார் இயக்குநர்.

படத்தைப் பற்றி சில விஷயங்களைக் கேட்டறிந்த கமலஹாசன், படம் வெற்றி பெற வாழ்த்துக்களையும் கூறியுள்ளார்.