"பிரியாணி'யால் போக்குவரத்து நெரிசல்

விழுப்புரம் செஞ்சி சாலையில் நடிகர் கார்த்தி நடிக்கும் பிரியாணி சினிமா படத்தின் படப்பிடிப்பு வியாழக்கிழமை நடைபெற்றதால் அப்பகுதியில் கடும் போக்குவரத்து நெரிசல் ஏற்பட்டது.
÷நடிகர் கார்த்தி, நடிகை ஹன்சிகா நடித்து இயக்குநர் வெங்கட்பிரபு இயக்கும் பிரியாணி சினிமா படப்பிடிப்பு வியாழக்கிழமை விழுப்புரம், செஞ்சி சாலையில் உள்ள டிராக்டர் ஷோரூமில் நடைபெற்றது.
÷அப்படத்தில் முக்கிய வேடத்தில் நடிக்கும் நடிகர் நாசருக்கு பிரமாண்ட கட் அவுட், நடிகர் ராம்கிக்கும் கட்அவுட்கள் செஞ்சி சாலையில் வைக்கப்பட்டிருந்தது. நடிகர் கார்த்தி ஷோரூமை திறக்கும் காட்சி நேற்று காலை முதல் படமாக்கப்பட்டது.
÷படப்பிடிப்பு நடைபெற்ற இடத்தில் போதிய போலீஸ் பாதுகாப்பு இல்லாத நிலையில், அதனை வேடிக்கை பார்க்க ஏராளமான மக்கள் சாலையின் நடுவே நின்றனர். இதனால் சாலையில் வாகனங்கள் செல்ல முடியாத நிலை ஏற்பட்டது.
÷செஞ்சி சாலையில் இரு சக்கர வாகனங்களில் கூட செல்ல முடியாமல் மக்கள் சிரமம் அடைந்தனர். இன்னும் 6 நாட்கள் அதே இடத்தில் படப்பிடிப்பு நடைபெற உள்ளதால், போக்குவரத்துக்கு இடையூறு இல்லாமல் போதிய போலீஸ் பாதுகாப்பு போட வேண்டும் என மக்கள் கோரிக்கை விடுத்துள்ளனர்.