சென்னை சர்வதேச திரைப்பட விழாவில் அமிதாப் பச்சன்

தமிழக அரசு மற்றும் திரைப்படத் துறையின் ஆதரவோடு இந்தியத் திரைப்படத் திறனாய்வுக் கழகம் ஏற்பாடு செய்துள்ள 10-வது சென்னை சர்வதேச திரைப்பட விழா டிசம்பர் 13 முதல் 20-ம் தேதி வரை சென்னையில் நடைபெறுகிறது.

இந்தியத் திரைப்படத் திறனாய்வுக் கழகம் 2003-ம் ஆண்டு முதல் சென்னை சர்வதேச திரைப்பட விழாவை நடத்தி வருகிறது.

இந்த ஆண்டு நடைபெறவுள்ள விழாவில் இடம்பெறும் படங்கள் உட்லண்ட்ஸ், உட்லண்ட்ஸ் சிம்பொனி, ஐநாக்ஸ், சத்யம், ராணி சீதை ஹால் மற்றும் கேசினோ திரையரங்குகளில் திரையிடப்படுகின்றன. இதில் 57 நாடுகளைச் சேர்ந்த 160-க்கும் மேற்பட்ட திரைப்படங்கள் பங்கேற்கின்றன. உலக சினிமா பிரிவில் கடந்த 12 மாதங்களில் வெளியான உலகின் மிகச் சிறந்த படங்கள் திரையிடப்பட உள்ளன. இந்த ஆண்டு கொலம்பியா, ஆஸ்திரேலியா, ஹங்கேரி மற்றும் துருக்கி நாடுகளைச் சேர்ந்த திரைப்படங்கள் மீது சிறப்பு கவனம் செலுத்தப்பட உள்ளது. டிசம்பர் 13-ம் தேதி நடைபெறும் தொடக்க விழா, ஏ.ஆர்.ரகுமான் இசைப்பள்ளி மாணவர்களின் இசை நிகழ்ச்சியுடன் தொடங்குகிறது. நிறைவு விழாவில் நடிகர் அமிதாப் பச்சன் பங்கேற்கிறார்.