விஸ்வரூபம் படத்தை திரையிட அனுமதிக்குமாறு ரஜினிகாந்த் கோரிக்கை

கமலின் விஸ்வரூபம் படத்தை திரையிட அனுமதிக்குமாறு இஸ்லாமிய சமூகத்தினருக்கு நடிகர் ரஜினிகாந்த் கோரிக்கை வைத்துள்ளார்.

விஸ்வரூபம் திரைப்படத்தில், இஸ்லாமியர்களுக்கு எதிரான கருத்துக்கள் படமாக்கப்பட்டுள்ளதாகக் கூறி, படத்தை வெளியிட 15 நாட்கள் தடை விதிக்கப்பட்டது. சுமார் 95 கோடி ரூபாய் செலவில் உருவாக்கப்பட்டுள்ள இந்த த்ரில்லர் படம் இன்று உலகமெங்கும் வெளியிடப்பட்டிருக்க வேண்டும். ஆனால், தமிழக அரசின் தடையால் படம் வெளியாவதில் சிக்கல் ஏற்பட்டுள்ளது.

இந்த நிலையில், கமலுக்கு ஆதரவாக குரல் எழுப்பியுள்ள ரஜினிகாந்த், இஸ்லாமிய சகோதரர்கள், விஸ்வரூபம் திரைப்படத்துக்கு விதிக்கப்பட்டுள்ள தடையை நீக்கி படம் வெளியாக உதவிடுமாறு கோரிக்கை வைத்துள்ளார். கமலுடன் பேசி, கதையில் எந்த பாதிப்பும் வராமல், காட்சிகளை எவ்வாறு மாற்றலாம் என்று ஆலோசியுங்கள் என்றும் அவர் வலியுறுத்தியுள்ளார்.

விஸ்வரூபம் படத்தை இஸ்லாமிய சமூக தலைவர்கள் வெளியீட்டுக்கு முன்பாக பார்க்க கமல் ஏற்பாடு செய்திருந்தார். ஆனால், அதனை இஸ்லாமியர்கள் மறுத்துவிட்டனர். இந்த வாய்ப்பு, கமல், இஸ்லாமியர்கள் மீதான மரியாதையை வெளிப்படுத்துவதாகவும் ரஜினிகாந்த் கூறியுள்ளார்.