பள்ளிப் பருவ வேடத்தில் ஹன்சிகா, சந்தானம்

'தீயா வேலை செய்யணும் குமாரு' திரைப்படத்தில் ஹன்சிகா, சந்தானம் ஆகியோர் பள்ளிப் பருவ வேடத்தில் நடித்துள்ளனர்.

'மத கஜ ராஜா' திரைப்படத்தைத் தொடர்ந்து சுந்தர்.சி-யின் அடுத்தப் படைப்பாக உருவாகி வரும் படம் 'தீயா வேலை செய்யணும் குமாரு'. இதில் சித்தார்த் நாயகனாகவும், ஹன்சிகா நாயகியாகவும் நடிக்கின்றனர். இவர்களுடன் இணைந்து கணேஷ் வெங்கட்ராமன், சந்தானம், உள்பட பலர் நடிக்கின்றனர். இதன் படப்பிடிப்பு சென்னை, கும்பகோணம், தஞ்சாவூர் ஆகியப் பகுதிகளில் நடந்து வருகிறது. அண்மையில் ஹன்சிகாவும், சந்தானமும் இடம்பெற்ற காட்சி ஒன்று படம்பிடிக்கப்பட்டது. அதில் இருவரும் பள்ளிச் சீருடையில் பள்ளிக்கூடம் செல்வது போன்று காட்சி அமைக்கப்பட்டிருந்தது.

ஏற்கெனவே சிங்கம்-2 திரைப்படத்தில் ஹன்சிகா பள்ளி மாணவியாக நடித்திருந்தார். இந்நிலையில் 'தீயா வேலை செய்யணும் குமாரு' திரைப்படத்திலும் அவர் மீண்டும் பள்ளி மாணவியாக நடித்திருப்பது குறிப்பிடத்தக்கது.