முதல் படத்திலே பாராட்டை அள்ளிய உதயநிதி

தயாரிப்பாளர், விநியோகஸ்தர் என்று கோடம்பாக்கத்தையே தன் சட்டைப் பாக்கெட்டுக்குள் கொண்டுவந்த உதயநிதி, ஹீரோவாகவும் கோடம்பாக்கத்தை தன் வசம் ஈர்க்க முடிவு செய்திருக்கிறார். அதில் வெற்றியும் பெற்று விடுவார் என்றே சொல்ல வேண்டும். ஏனென்றால் இவர் நடித்திருக்கும் முதல் படமான 'ஒரு கல் ஒரு கண்ணாடி' படத்தின் இசை சமீபத்தில் வெளியானது. பாடல்களை பாராட்டிய அத்தனைப் பேரும் அதில் நடித்த உதயநிதியையும் வெகுவாக பாராட்டியிருக்கிறார்கள். ரசிகர்களிடம்கூட பாராட்டுக்களை பெற்று விடலாம். ஆனால், கூடவே பணிபுரியும் தொழில்நுட்ப கலைஞர்களின் பாராட்டைப் பெறுவதென்பது அவ்வளவு சுலபமில்லை. உதயநிதியை பொறுத்தவரையில் தனது எதார்த்த நடிப்பின் மூலம் அனைத்து தொழில்நுட்ப கலைஞர்களிடமும் பாராட்டைப் பெற்றிருக்கிறார். குடும்பமே கலைக்குடும்பமாச்சே.. இதுல கலைஞரின் பேரனுக்கு என்ன கஷ்டம் இருக்கப்போகிறது என்கிறீர்களா.. சரி அத விடுங்க.. முதல் படத்தை வெற்றிகரமாக முடித்த உதயநிதியிடம் அடுத்தப் படம் என்ன என்று கேட்டால்? இப்போதைக்கு அடுத்தப் படத்தைப் பற்றி யோசிக்கவில்லை. ஆனால், அடுத்த படமும் இயக்குநர் ராஜேஷ் படமாகத்தான் இருக்க வேண்டும் என்று நினைக்கிறேன். ஏன் என்றால் அவருக்கு தான் தெரியும் எனக்கு எந்த மாதிரியான கதை சூட்டாகும், எனது பாடிலேங்குவேஜ் எப்படி என்பதெல்லாம். அதனால் அவர் அடுத்ததாக கார்த்தியை வைத்து இயக்கும் படம் முடியும் வரை நான் காத்திருப்பேன். பிறகு அவருடனே சேர்ந்து எனது அடுத்தப் படத்தை துவங்குவேன். இதை அவரிடமே நான் சொல்லியிருக்கிறேன்." என்றார். ராஜேஷ் படம் ராஜேஷ் படம் என்று சொல்லி கடைசியில் காமெடி பீசா ஆகாமல் இருந்தால் சரி! அதுசரி... சுய விமர்சனம்... சுப விமோட்சம்!