செக்ஸ் தொழிலாளியான சார்மி!

தெலுங்கில் இது செக்ஸ் தொழிலாளிகளை மையப்படுத்தி படம் எடுக்கும் சீஸன் போலிருக்கிறது. ஸ்ரேயாவை தொடர்ந்து சார்மியும் ஒரு தெலுங்குப் படத்தில் பாலியல் தொழிலாளியாக நடிக்கப் போகிறார். தெலுங்கு தேசத்தில் 'டென்த் கிளாஸ்' படத்தின் மூலம் பரபரப்பை ஏற்படுத்தியவர் இயக்குநர் சந்து. இவர் அடுத்து இயக்கும் படத்தில்தான் சார்மிக்கு பாலியல் தொழிலாளி வேடம். குடும்பச் சூழ்நிலை காரணமாக பாலியல் தொழிலுக்கு தள்ளப்படும் இளம்பெண் ஒருவர் மனதில் பல ஏக்கங்களைச் சுமந்தபடி சோகத்துடன் வாழ்ந்து கொண்டிருக்கிறாள். இந்நிலையில் அவளைச் சந்திக்கிறான் இளைஞன் ஒருவன். சிறந்த பாடகரும் எழுத்தாளருமான அவனைச் சந்தித்த பிறகு வாழ்க்கையில் புதிதாக ஒரு பிடிப்பு கிடைத்ததுபோல் உணர்கிறாள் அப்பெண். இருவருக்கும் இடையே காதல் மலர்கிறது. ஆனால் அது திருமணத்தில் முடிந்ததா, பாலியல் தொழிலில் இருந்து அப்பெண்ணால் வெளியே வர முடிந்ததா? என்கிற ரீதியில் போகிறதாம் இப்படத்தின் கதை. "இந்தக் கதையை உருவாக்கியபோதே சார்மிதான் என் மனதில் முதலில் தோன்றினார். அவரை அணுகி கதையைச் சொன்னதும் எந்தவிதமான தயக்கமும் இன்றி நடிக்க ஒப்புக் கொண்டார். இந்தப் படத்தின் மூலம் அவரது நடிப்பாற்றலை ரசிகர்களால் முழுமையாக பார்க்க முடியும்" என்கிறார் இயக்குநர் சந்து. செக்ஸ் தொழிலாளியாக நடிக்க சிரமமாக இருக்குமே? சார்மியிடம் கேட்டால், "இதில் என்ன சிரமம் இருக்கிறது. அவர்களைப் போல் பரிதாபத்திற்குரிய ஜீவன்களைப் பார்க்க முடியாது. இப்படியொரு பாத்திரத்தில் நடிப்பதன் மூலம் அப்பெண்களின் உணர்வுகளையும் அவர்களின் பரிதாப நிலையையும் சமுதாயத்திற்கு எடுத்துச் சொல்ல முடியும். அந்த வகையில் பெருமையாக உணர்கிறேன்" என்று உணர்ச்சிப்பூர்வமாகப் பேசுகிறார் சார்மி. ஸ்ரேயாவோ ஒருபடி மேலே சென்று பாலியல் தொழிலில் ஈடுபட்டுள்ள பெண்களுக்கு உதவும் வகையில் புதிய அமைப்பு ஒன்றை தொடங்கலாமா என்று யோசித்துக் கொண்டிருக்கிறாராம். இரண்டுபேரும் சேர்ந்து இந்த ஜீவன்களை வதைக்காம இருந்தா சரி!