வெற்றிமாறனோடு தனுஷா?

சிம்பு நடிப்பில் ஒரு படம் தொடங்கப்பட்டால், சிம்புவிற்கு மட்டும் தான் அப்படம் எப்போது வெளியாகும் என்பது தெரியும். 'பொல்லாதவன்', 'ஆடுகளம்' என்று தனுஷ் உடன் கூட்டணி அமைத்த வெற்றிமாறன், சிம்பு நடிப்பில் 'வடசென்னை' என்னும் படத்தினை இயக்க இருப்பதாக தெரிவித்தார். இப்படத்தினை தயாரிக்க முன்வந்தது க்ளவுட் நைன் மூவிஸ் நிறுவனம். 'போடா போடி', 'வேட்டை மன்னன்' என தான் நடித்து வரும் படங்களில் கவனம் செலுத்தி வந்த சிம்பு, 'வட சென்னை' படம் குறித்து எவ்வித தகவலோ, எப்போது படப்பிடிப்பு என்று தெரிவிக்காமல் இருந்தார். இந்நிலையில் தற்போது அப்படத்தினை தற்காலிகமாக தள்ளிவைப்பதாக அறிவித்த வெற்றிமாறன், மீண்டும் தனுஷ் உடன் கூட்டணி அமைத்து இருக்கிறார். 'ஆடுகளம்' படக்குழுவினரான தனுஷ், வெற்றிமாறன், ஜீ.வி.பிரகாஷ், வேல்ராஜ், எடிட்டர் கிஷோர் என அனைவருமே இப்படத்திலும் இணைகிறார்கள். 'வடசென்னை' படம் சிறிது காலம் கழித்து தொடங்கப்படும். அதில் சிம்பு நடிப்பார், என்று வெற்றிமாறன் தெரிவித்து இருக்கிறார். இதுகுறித்து தயாநிதி அழகிரி, ஜீ.வி.பிரகாஷ், தனுஷ், வெற்றிமாறன் என அனைவருமே பேசி வந்தாலும், சிம்பு இன்னும் எவ்வித தகவலும் தெரிவிக்கவில்லை. 'வடசென்னை' எப்போது துவங்கும் என்பது சிம்புவின் கால்ஷீட்டைப் பொறுத்தே அமையும். வட போச்சு.. சேவல் வந்தது... டம் டும் டும்.....!