நடிகர் சங்கத்தை அவமதித்ததாக புகார்: நடிகர் குமரிமுத்துக்கு நோட்டீஸ்

காமெடி நடிகர் குமரிமுத்து நடிகர் சங்கத்தை அவமதித்ததாக குற்றம் சாட்டப்பட்டு உள்ளது. நடிகர் சங்க பொறுப்பில் இருப்பவர்களை மரியாதையின்றி பேசுவதாகவும் நடிகர் சங்க கட்டிடம் கட்டும் விவகாரத்தில் உண்மைக்கு மாறான தகவல்களை வெளியிடுவதாகவும் புகார் கூறப்பட்டு உள்ளது.

இதையடுத்து குமரிமுத்துவிடம் விளக்கம் கேட்டு நோட்டீஸ் அனுப்பப்பட்டு உள்ளது. நடிகர் சங்க பொதுச் செயலாளர் ராதா ரவி இந்த நோட்டீசை அனுப்பி உள்ளார். இதற்கு நடிகர் குமரிமுத்து பதில் கடிதம் அனுப்பி உள்ளார். அதில் கூறி இருப்பதாவது:-

நான் யாரையும் அவ மதிக்கவில்லை. 44 ஆண்டு காலமாக நாடகம் மற்றும் சினிமா தொழிலில் இருந்து வருகிறேன். எந்த முன்னணி நடிகரும் என்மீது சிறு குறையை கூறியது இல்லை. சங்க இடம் தொடர்பாக என் சந்தேகங்களை நிவர்த்தி செய்து கொள்வதற்காகவே தங்களுக்கு கடிதம் எழுதினேன். என்னைப் போல் நிறையபேர் கருத்து வெளியிட்டு உள்ளனர். அவர்களுக்கு இது போல் விளக்கம் கேட்டு கடிதம் அனுப்பப்பட்டதா என்று எனக்கு தெரியவில்லை.

எம்.ஜி.ஆர். சிவாஜி கணேசன், என்.எஸ்.கிருஷ்ணன், சகஸ்ரநாமம், நம்பிராஜன் போன்றோர் கட்டி காத்த சொத்தை காப்பாற்ற வேண்டும். சங்க நலனை காத்திட வேண்டும் என்று கேட்டுக் கொள்கிறேன்.

இவ்வாறு கடிதத்தில் கூறியுள்ளார்.