சுட்ட கதை

சென்னை : லிப்ரா புரொடக்ஷன் சார்பில் ரவீந்தர் சந்திரசேகர் தயாரிக்கும் படம், ‘சுட்ட கதை’. பாலாஜி, வெங்கி, லட்சுமி பிரியா நடிக்கிறார்கள். நிஷார் ஒளிப்பதிவு. மேட்லி புளூஸ் இசை அமைக்கிறார். படத்தின் அறிமுக விழாவில் இயக்குனர் சுபு நிருபர்களிடம் கூறியதாவது: காமெடி படங்களில் ஒரு வகை, பிளாக் ஹியூமர் வகை. அதாவது திகில் படங்களை காமெடியாகச் சொல்வது. தமிழில் பல படங்களில் சில காட்சிகள் இந்த வகையில் வந்திருக்கிறது. ‘மகளிர் மட்டும்’ படத்தில் நாகேஷ் பிணமாக நடிப்பது, ‘சந்திரமுகி’யில் ரஜினியும், வடிவேலுவும் மர்ம பங்களாவுக்குள் நுழைந்து கலாட்டா பண்ணுவது,

இவை திகில் காட்சியாக இருந்தாலும் திகிலை விட சிரிப்புதான் பிரதானமாக இருக்கும். அதுதான் பிளாக் ஹியூமர் எனப்படுவது. இந்த வகை காமெடியில் முழுப் படத்தையும் உருவாக்குகிறோம். கோரமலை என்ற கிராமத்தில் அடிக்கடி கொலை நடக்கும். அதை கண்டுபிடிக்கப்போகும் இரண்டு கான்ஸ்டபிள்களின் கதை. இருவருக்கும் உதவுவது அவர்கள் படித்த காமிக்ஸ் புத்தகங்கள். அதில் வரும் திருப்பங்களை வைத்து கொலையை கண்டுபிடிப்பது போலான கதை. ஹீரோயின் மலைவாழ் கிராமத்தை சேர்ந்த பெண்ணாக நடித்திருக்கிறார்.