காஜல் அகர்வாலின் பயணக்கட்டுரை கனவு

சென்னை : பயணக்கட்டுரை எழுதுவது என் கனவு. அது இப்போது நிறைவேறி இருக்கிறது என்று காஜல் அகர்வால் கூறினார். தமிழ் மற்றும் தெலுங்கு பட ஷூட்டிங்கிற்காக சமீபத்தில் ஐரோப்பிய நாடுகளுக்கு சென்றுவந்தார் காஜல் அகர்வால். அங்கு அவர் பார்த்த இடங்களையும் அங்குள்ள பழக்கவழக்கம் பற்றியும் கட்டுரை எழுதி தருமாறு ஆங்கில இதழ் ஒன்று அவரைக் கேட்டுக்கொண்டது. இதையடுத்து எழுதத் தொடங்கிய காஜல் அகர்வால் கூறியதாவது:

ஐரோப்பிய நாடுகளில் சுவிட்சர்லாந்து, ஸ்லோவேனியா, நார்வே நாடுகளில் நடந்த படப்பிடிப்புகளில் கலந்துகொண்டேன். இதில் நார்வே நாட்டுப் பகுதிகள் என் மனதில் அப்படியே பதிந்துவிட்டது. அங்கு நான் பார்த்த இடங்களும் வரலாற்றுச் சின்னங்களும் என்னை வியப்பில் ஆழ்த்தின. அங்குள்ள கிராமங்களுக்குக் கூட சென்று வந்தேன். இயற்கை காட்சிகள் அவ்வளவு பிரமாதமாக இருக்கின்றன.

ஸ்ட்ராபெர்ரி பழத் தோட்டத்துக்குள் சென்று வந்த காட்சியை இப்போது நினைத்தாலும் சிலிர்க்கிறது. அந்த அனுபவங்களை எழுதி வருகிறேன். நான் தகவல் தொடர்புத்துறை மாணவி என்பதால் எழுதுவதில் விருப்பம் அதிகம். பயணக்கட்டுரை எழுதுவது என் கனவு. அது இப்போது நிறைவேறி இருக்கிறது. இவ்வாறு காஜல் அகர்வால் கூறினார்.