விக்ரம் கேள்விக்கு பதில் சொல்லாத இஷா

ஷூட்டிங் ஸ்பாட்டில் பேசியபோது இஷா ஷெர்வானி பதில் பேசாமல் மவுனமாக இருந்தார்’ என்றார் விக்ரம். விக்ரம், ஜீவா நடிக்கும் படம் ‘டேவிட்’. தமிழ், இந்தி யில் உருவாகிறது. பிஜோய் நம்பியார் இயக்குகிறார். இப்படத்தில் நடித்த அனுபவம்பற்றி விக்ரம் கூறியதாவது: முதன்முறையாக நானும் ஜீவாவும் சேர்ந்து நடிக்கிறோம். தபு, லாரா தத்தா, நீல் நிதின் முகேஷ், இஷா ஷெர்வானி நடிக்கின்றனர். எல்லோருமே அர்ப்பணிப்புடன் பணியாற்றினர். குறிப்பாக இஷா ஷெர்வானி அந்த கதாபாத்திரமாகவே மாறிவிட்டார்.

காது கேளாத, வாய்பேசாத மாற்றுத்திறனாளியாக அவர் வேடம் ஏற்றிருக்கிறார். ஷூட்டிங்கிற்கு வந்து காட்சி தொடங்குவதற்கு முன்பே அவர் அந்த பாத்திரத்தில் மூழ்கிவிடுவார். பல நேரங்களில் அந்த அனுபவத்தை நான் உணர்ந்திருக்கிறேன். காட்சி பற்றி அவரிடம் விவாதிப்பேன். ஆனால் அவர் நான் கேட்கும் எந்த கேள்விக்கும் பதில் சொல்லமாட்டார். பிறகுதான் மாற்றுத்திறனாளி வேடம் ஏற்றிருக்கும் அவர் அந்த கேரக்டராகவே வாழ்ந்துகொண்டிருக்கிறார் என்பதை புரிந்துகொண்டேன். இதில் மீனவராக நான் நடித்திருக்கிறேன்.