புதுவையில் மறியல் போலீஸ் தடியடி

புதுவையில் விதிக்கப்பட்டிருந்த தடை நேற்று காலை வரை நீக்கப்படவில்லை. பகல் 1.30 மணிக்கு தடையை நீக்கி ஆட்சியர் தீபக்குமார் உத்தரவிட்டார். உத்தரவுக்கு பின்னரும் படம் ரிலீஸ் ஆகாததால் ரசிகர்களிடையே கொந்தளிப்பு ஏற்பட்டது. எதிர்ப்பு, தடை, கோர்ட் தீர்ப்பு என பரபரப்புக்கு இடையே கமல் படத்தை காண வந்திருந்த ஆயிரக்கணக்கான ரசிகர்கள் ஆத்திரமடைந்தனர். ராஜா தியேட்டர் அருகே திடீர் மறியலில் ஈடுபட்டனர். அவர்களை பெரியக்கடை போலீசார் கைது செய்தனர்.

அரசு உத்தரவுக்கு பிறகு படம் திரையிடப்படும் என அறிவிப்பு பலகை வைக்கப்பட்டது. பல மணி நேரம் காத்திருந்தும் திரையிடப்படாததால், கமல் ரசிகர்கள் ரத்னா தியேட்டர் எதிரில் மறியலில் ஈடுபட்டு கண்டன கோஷங்களை எழுப்பினர். போக்குவரத்து பாதிக்கப்பட்டதால், போலீசார் தடியடி நடத்தி கூட்டத்தை கலைத்தனர். கூட்டத்தில் இருந்த சிலர் கல்வீசியதில் சாலையில் சென்ற ஒருவரது மண்டை உடைந்தது. இதனால் புதுவையில் நேற்று பிற்பகல் வரை பரபரப்பு நிலவியது. அனைத்து தியேட்டர் வாயிலிலும் பலத்த போலீஸ் பாதுகாப்பு போடப்பட்டுள்ளது.

இது குறித்து புதுவை மாநில திரையரங்க உரிமையாளர் சங்க தலைவர் லக்கி பெருமாள் கூறுகையில், ‘புதுவையில் தடை நீக்கப்பட்டாலும், மேல்முறையீடு செய்யப்பட்டு உள்ளதால் புதுவையில் திரையிடுவதற்கான வாய்ப்பு இல்லை. பல கோடிக்கணக்கில் முதலீடு செய்து காத்திருக்க வேண்டிய நிர்ப்பந்தத்துக்கு ஆளாக்கப்பட்டு உள்ளோம்’ என்றார்.