இந்தோனேஷியா: "குழந்தை விற்கும் கும்பல்" விசாரிக்கப்படுகிறது

இந்தோனேஷியாவிலிருந்து குழந்தைகள் சிலவற்றை சட்டவிரோதமாக சிங்கப்பூருக்கு கொண்டு சென்று அங்கிருந்து வெளிநாடுகளில் அக்குழந்தைகளை விற்கும் செயலில் ஈடுபட்டுவருவதாக சந்தேகிக்கப்படும் குற்றக் கும்பல் ஒன்றை தாம் விசாரித்து வருவதாக இந்தோனேஷிய பொலிசார் கூறுகின்றனர்.

எட்டு பேர் கைதுசெய்யப்பட்டுள்ளார்கள். இதில் மகப்பேற்று தாதியரும், தனது பிள்ளையை விலைக்கு விற்றதாக குற்றம்சாட்டப்படும் தாய் ஒருவரும் அடங்குவர் என்று பொலிசார் தெரிவிக்கின்றனர்.

மூன்று பிள்ளைகளும் காப்பாற்றப்பட்டுள்ளனர்.

ஜாவாவின் மேற்குப் பகுதியிலுள்ள ஏழைக் குழும்பங்களிடம் இருந்து ஒரு பிள்ளை சுமார் இரண்டாயிரம் டாலர்கள் என்ற விலைக்கு வாங்கப்பட்டுள்ளன என்று விசாரணையாளர்கள் கூறுகின்றனர்.

சிங்கப்பூருக்கு செல்வதற்கான விமானப் பயண விவரங்கள் மற்றும் பயணச் சீட்டுகள் போன்றவற்றை அவர்கள் பறிமுதல் செய்துள்ளனர்.

இவ்வாறு கொண்டுசெல்லப்படும் பிள்ளைகள் சில மலேஷியா, ஆஸ்திரேலியா போன்ற நாடுகளில் தத்துப் பிள்ளை தேவைப்படும் ஜோடிகளிடம் விற்கப்படுகிறது என்பதற்கு தடயங்கள் கிடைத்துள்ளதாக சிறார் பாதுகாப்பு அதிகாரி கூறினார்.