புதிய போப் தேர்வில் இப்போதைய போப் தலையிடமாட்டார்"

போப் பெனடிக்ட் அவர்கள் தனக்கு அடுத்து யார் போப்பாக தேர்ந்தெடுக்கப்படுவார்கள் என்பது தொடர்பில் எந்தப் பங்கையும் வகிக்க மாட்டார் என்று வாட்டிகன் அறிவித்துள்ளது.

அதே போல, கத்தோலிக்கத் திருச்சபையை நிர்வகிப்பதிலும், பதவி விலகிய பிறகு அவர் எந்த வகையிலும் ஈடுபடமாட்டார் எனவும் அறிவிக்கப்பட்டுள்ளது.

மேலும், எவ்விதமான குறிப்பிட்ட உடல் நலக் குறைவு காரணமாகவும் அவர் பதவி விலகவில்லை என்பதையும் வாட்டிகன் உறுதிப்படுத்தியுள்ளது.

போப் பெனடிக்ட் அவர்கள், இதயத் துடிப்பை சீராக வைத்திருக்க செயற்கை கருவியை சில காலமாக பொருத்தியிருந்தார் என்றாலும், அவர் பொதுவாக நல்ல அரோக்கியத்துடனேயே இருந்தார் என வாட்டிகானின் பேச்சாளர் தெரிவித்துள்ளார்.
ஈஸ்டருக்கு முன்னர் புதிய போப்

விடை பெறுகிறார் போப் பெனடிக்ட்

கடந்த அறுநூறு ஆண்டுகளில் முதல் முறையாக பதவி விலகும் ஒரு போப்பாக பெனடிக்ட் அவர்கள் இருக்கும் நிலையில், அவர் பதவி விலகுவதற்கு முதல் நாள் அதாவது இம்மாதம் 27 ஆம் தேதி புனித பீட்டர் சதுக்கத்திலிருந்து ஒரு திருப்பலி பூசையை நடத்துவார்.

அடுத்த போப் லத்தீன் அமெரிக்கப் பகுதி அல்லது ஆபிரிக்காவிலிருந்து தேர்தெடுக்கப்படக் கூடும் என ஊகங்கள் எழுந்துள்ளன.

புதிய போப் ஈஸ்டர் திருநாளுக்கு முன்னர், கார்டினல்களின் கூட்டத்தில் தேர்தெடுக்கப்படுவார் எனவும் கூறப்படுகிறது.