ஐஃபாவில் பிரபுதேவா

முன்பெல்லாம் பொது விழாக்களில் வருந்தி அழைத்தால் ஓரமாக வந்து கை கட்டி பாவ்லா காட்டுவார் பிரபுதேவா. இப்போது அவருக்கும் புகழ் வெளிச்சத்தின் மீது தணியாத தாகம். எந்த விழாவாக இருந்தாலும் ஓடிப் போய் கலந்து கொள்கிறார்.

ஐபிஎல் தொடக்க விழா நிகழ்ச்சியில் கலந்து கொண்டவர் ஒரு ஆட்டமும் போட்டார். அதற்கு நல்ல வரவேற்பு. இயக்குனராக மட்டும் இருந்தால் கிடைக்காத வெளிச்சம் இதுபோன்ற விழாக்களில் ஆடும் போது கிடைக்கிறது.

சிங்கப்பூ‌ரில் நடக்கும் இண்டர்நேஷனல் இந்திய ஃபிலிம் அவார்ட்ஸில் பிரபுதேவா ஆட்டம் போடுகிறார். இந்த விழாவில் இந்திய என்ற பெயர் இருந்தாலும் இந்திப் படங்கள் மட்டுமே கணக்கில் எடுத்துக் கொள்ளப்படும். இதுதான் ஐஃபா என்ற அழுகுணியின் லட்சணம். சிங்கப்பூ‌ரில் ஜூ‌ன் 7 முதல் 9 வரை இந்த விழா நடக்கிறது.