புகை போஸ்டரால் பிரச்சனை

கேரளாவில் பொது இடங்களில் புகைப்பிடிக்க தடை விதிக்கப்பட்டிருக்கிறது. இப்படியொரு தடை தமிழகத்தில் இருந்தாலும் கேரளாவில் இந்தச் சட்டம் ஓரளவு (கவனிக்க... ஓரளவுதான்) நடைமுறைப்படுத்தப்படுகிறது. இந்த சட்டத்தையோட்டி போடப்பட்ட இன்னொரு சட்டம், புகைப்பிடிக்கும், மது அருந்தும் காட்சிகள் அடங்கிய போஸ்டர்களுக்கான தடை.

இந்தச் சட்டத்தை மீறி ரெஞ்சித் இயக்கிய ஸ்பிரிட் படத்தின் மோகன்லால் புகைப்பிடிக்கும், மது அருந்தும் காட்சிகளை போஸ்டரில் வெளியிட்டனர். இது பிரச்சனையை கிளப்பியது. படம் வெளியான பிறகு மது அரக்கனுக்கு எதிரான படம் என்று எதிர்த்தவர்களே பாராட்டிய நகைமுரணும் நடந்தது.

தற்போது மேட்னி என்ற படத்தின் போஸ்டரில் அப்பட நாயகி மைதிலி புகைப்பிடிப்பது போன்ற காட்சியை போஸ்டரில் வெளியிட்டுள்ளனர். கடுப்பான சுகாதாரத்துறை இயக்குனர் அனிஷ் உபாசானா மற்றும் நடிகை மைதிலி இருவர் மீதும் வழக்குப் பதிவு செய்துள்ளனர். குற்றம் நிரூபிக்கப்பட்டால் இரண்டு பேரும் கம்பி எண்ண வேண்டிவரும் என்கிறார்கள்.

இந்தப் படத்தில் மைதிலியின் பெயர் என்ன தெரியுமா? சாவித்திரி.