ஸ்ரீவில்லிபுத்தூர் சீனிவாச பெருமாள் கோவில்

ஸ்ரீவில்லிபுத்தூர் அருகே உள்ள திருவண்ணாமலை சீனிவாச பெருமாள் கோவிலில், சீனிவாச பெருமாள் நின்ற கோலத்தில் காட்சி தருகிறார். இங்கு யோக நரசிம்மர், பால நரசிம்மர், கருடாழ்வார், ஆழ்வார்கள், நவநீதகிருஷ்ணன் ஆகியோருக்கு தனித்தனியே சன்னதிகள் உள்ளன.

இங்கு வீற்றிருக்கும் பாலநரசிம்மர் சிலை குழந்தை வடிவில் உள்ளது. குழந்தையாக இருப்பதால் இவருக்கு உடைகள் எதுவும் அணிவிக்கப்படவில்லை. மேலும் ஆதியும் நானே, அந்தமும் நானே என்பதை உணர்த்தும் வகையில் பாலநரசிம்மர் சிலை வடிவமைக்கப்பட்டு உள்ளது.

இதனால் பாலநரசிம்மரின் அடிபாதம் தெரியாது. முற்றிலும் மறைக்கப்பட்டு இருக்கும். இப்படி பாலநரசிம்மர் குழந்தையாக வீற்றிருப்பதை வேறு எங்கும் காண முடியாது. குழந்தைகளுக்கு மந்தம், பயம் போன்றவை நீங்க பாலநரசிம்மரை வணங்கினால் பலன் கிடைக்கும்.

குழந்தைகளுக்கு இங்கு வசம்பை கையில் கட்டி விடுகின்றனர். இதனால் குழந்தைகளுக்கு எந்த நோயும் அண்டாது என்பது நம்பிக்கை. மேலும் இங்கு `பிரம்மச்சாரி மரம்' ஒன்றும் காணப்படுகிறது. தாயாரின் வடிவமாக இது கருதப்படுகிறது.

போக்குவரத்து வசதி:

இந்த கோவிலுக்கு செல்ல சென்னை கோயம்பேடு பேருந்து நிலையத்திலிருந்து பஸ் வசதி உள்ளது.