இந்தியாவுக்குள் ஊடுருவ 200 பாகிஸ்தான் தீவிரவாதிகள் எல்லையில் காத்திருக்கின்றனர்: ராணுவ அதிகாரி தகவல்

இந்திய ராணுவத்தின் 16வது பிரிவு ஆணையர் லெப்டினென்ட் ஜெனரல் டி.எஸ்.ஹுடா, நிருபர்களுக்கு பேட்டி அளித்தார். அப்போது அவர் கூறியதாவது:-

இந்திய எல்லையை ஒட்டியுள்ள பாகிஸ்தான் பகுதியில் தீவிரவாதிகளுக்கு பயிற்சி அளிக்கும் சுமார் 30 முகாம்கள் அமைக்கப்பட்டுள்ளன. அந்த முகாம்களில் பயிற்சி பெற்ற 200க்கும் அதிகமான தீவிரவாதிகள், எந்த நேரத்திலும் இந்தியாவிற்குள் ஊடுருவி நாச வேலையில் ஈடுபட தயாராக காத்திருக்கின்றனர்.

அவர்களின் திட்டத்தை முறியடிக்கும் விதமாக நமது ராணுவ வீரர்கள் விழிப்புடன் எல்லைப் பகுதியை கண்காணித்து வருகின்றனர். பாகிஸ்தானில் பாராளுமன்ற தேர்தல் முடிவடைந்த பின்னர் எல்லையோரம் அதிரடியாக தாக்குதல் நடத்தவும் தீவிரவாதிகள் திட்டமிட்டுள்ளனர். எந்த சூழ்நிலையையும் சந்திக்க தயாராக இருக்கும்படி நமது வீரர்கள் அறிவுறுத்தப்பட்டுள்ளனர்.

இவ்வாறு அவர் கூறினார்.