பாக்ஸ் ஆபீஸில் மோதும் கரீனா, ராணி, பிரீத்தி, ஸ்ரீதேவி: ஜெயிக்கப் போவது யார்?

மும்பை: இந்த மாத இறுதியில் கரீனா கபூரின் ஹீரோயின், அடுத்த மாத துவக்கத்தில் ஸ்ரீதேவி, பிரீத்தி ஜிந்தா, ராணி முகர்ஜி ஆகியோரின் படங்கள் ரிலீஸாகின்றன. இதில் யாரின் படம் வெற்றி பெறப்போகிறது என்ற எதிர்பார்ப்பு ஏற்பட்டுள்ளது.
கரீனா கபூரின் ஹீரோயின் படம் வரும் 21ம் தேதி அதாவது அவரது பிறந்தநாளன்று ரிலீஸ் ஆகிறது. இந்த படம் நிச்சயம் ஹிட்டாகும் என்பதோடு, கரீனாவுக்கு விருதுகளை வாங்கித் தரும் என்று எதிர்பார்க்கப்படுகிறது. இந்நிலையில் தயாரிப்பாளராக மாறியுள்ள பிரீத்தி ஜிந்தாவின் இஷ்க் இன் பாரீஸ் மற்றும் பல ஆண்டுகள் கழித்து ரீஎன்ட்ரி கொடுக்கும் ஸ்ரீதேவியின் இங்கிலீஷ் விங்கிலீஷ் ஆகிய படங்கள் வரும் அக்டோபர் மாதம் 5ம் தேதி ரிலீஸ் ஆகின்றன. இதோ நானும் போட்டிக்கு வருகிறேன் என்று ராணி முகர்ஜியின் அய்யா படம் அக்டோபர் 12ம் தேதி ரிலீஸ் ஆகிறது.
பாலிவுட்டின் பெரிய நட்சத்திரகங்களின் இந்த படங்களில் யாருடைய படம் சூப்பர் ஹிட்டாகப் போகிறது என்ற எதிர்பார்ப்பு ஏற்பட்டுள்ளது. இந்நிலையில் கரீனாவின் ஹீரோயின் தான் மற்ற படங்களை விட நன்றாகப் போகும் என்று கூறப்படுகிறது. அதே சமயம் ராணி, பிரீத்தியின் ரசிகர்கள் பட்டாளத்திற்கும் குறைவில்லை.
நீண்டடட காலம் கழித்து நடிக்க வந்துள்ள ஸ்ரீதேவியின் படத்திற்கும் எதிர்பார்ப்புகள் உள்ளது. அய்யாவில் மலையாள நடிகர் ப்ரித்விராஜும், இங்கிலீஷ் விங்கிலீஷில் அஜீத் குமாரும் நடித்துள்ளனர் என்பது குறிப்பிடத்தக்கது.
இந்த நான்கு தேவியாரில் ஜெயிக்கப் போவது யார் என்று நீங்கள் நினைக்கிறீர்கள்?