எனது ஒரே மகளுக்கு 12 வயதாகிறது. 6ம் வகுப்பு படிக்கிறாள். பிடிவாதம் அதிகம். பெரியவர்களை மதிப்பதில்லை. இவள் குணம் மாறி, நன்கு படித்து முன்னேறி, என் கவலைகளைப் போக்க நல்லதொரு பரிகாரம் கூறுங்கள்.

குழந்தைப் பருவம், அபரிமிதமான கற்பனை வளம் கொண்டது. நாம் நினைத்துப் பார்க்காத கோணங்களில் எல்லாம் சிந்திக்கக் கூடியவர்கள் இந்தக் காலத்துப் பிள்ளைகள். உங்கள் குழந்தையின் ஜாதகத்தில் 12ல் கேது வீற்றிருக்கிறார்.

புதிய சாதனை செய்ய மனம் பறக்கும். சிறிய வயதில் கொஞ்சம் வேகமாக இருந்தாலும், நான்கைந்து வருடங்களுக்குள் மாறிவிடுவாள். கல்வியைக் கொடுக்கும் புதன் உச்சமாக இருக்கிறான்.

பிடிவாதம், ஆர்ப்பாட்டம், தனது எண்ணப்படி நடப்பது போன்றவையெல்லாம் எதிர்காலத்தில் பெரிய காரியங்களை சாதிக்கப் போவதற்கான அறிகுறியே ஆகும். மரகதப் பச்சைக்கல் மோதிரத்தை அவள் அணியச் செய்யுங்கள்.

7 சனிக்கிழமைகள் ஐயப்ப பக்தர்களுக்கு பல நிறங்கள் கொண்ட வஸ்திரத்தை தானமாகக் கொடுங்கள். அரச மரத்தடியிலிருக்கும் கருங்கல் நாகருக்கு பன்னீர் அபிஷேகம் செய்து அதை குழந்தையைப் பருகச் செய்யுங்கள்.

‘என் மகள் இவள்’ என நீங்கள் பெருமை கொள்ளும் அளவுக்கு, ஊர் மெச்ச அவள் வாழ்வாள்.