கொடுங்கையூரில் ஆட்டோ டிரைவர் வெட்டிக் கொலை

கொடுங்கையூர் சூழபுனல்கரை அம்பேத்கார் தெருவை சேர்ந்தவர் பாட்ஷா என்கிற சரவணன் (வயது 32). ஆட்டோ டிரைவர். இவரது மனைவி சாவித்திரி. இவர்களுக்கு ஒரு மகன், மகள் உள்ளனர். நேற்று மாலை வீட்டில் இருந்த சரவணனை 4 வாலிபர்கள் அழைத்துச் சென்றனர். பின்னர் அவர் திரும்பி வரவில்லை. பதட்டம் அடைந்த சாவித்திரி உறவினர்களோடு பல இடங்களில் தேடினார்.

நள்ளிரவில் மாதவரத்தில் உள்ள தனியார் தோல் தொழிற்சாலை அருகே முட்புதரில் வாலிபர் பலத்த வெட்டுக் காயத்துடன் உயிருக்கு போராடுவதாக போலீசுக்கு தகவல் கிடைத்தது. போலீசார் விரைந்து சென்று அந்த வாலிபரை மீட்டு ஸ்டான்லி அரசு ஆஸ்பத்திரியில் சேர்த்தனர்.அவருக்கு தீவிர சிச்சை அளிக்கப்பட்டு வந்தது. விசாரணையில் அவர் மாயமான சரவணன் என்பது தெரிந்தது.

இது குறித்து மாதவரம் போலீசார் கொடுங்கையூர் போலீசுக்கு தகவல் தெரிவித்தனர். இந்த நிலையில் ஆஸ்பத்திரியில் சிசிச்சை பெற்று வந்த சரவணன் இன்று அதிகாலை பரிதாபமாக இறந்தார். இதையடுத்து இந்த வழக்கு கொடுங்கையூர் போலீசுக்கு மாற்றப்பட்டது. இன்ஸ்பெக்டர் சம்பத் மற்றும் போலீசார் வழக்கு பதிவு செய்து விசாரணை நடத்தினர். இது குறித்து சரவணனின் மனைவி சாவித்திரி போலீசிடம் கூறும் போது, நேற்று இரவு அதே பகுதியை சேர்ந்த ரவுடிகள் முட்டை கோபி, காமேஷ், அசோக் மற்றும் ஒருவர் கணவர் சரவணனை வெளியில் அழைத்துச் சென்றனர். அவர்கள் தான் கணவரை கொலை செய்து இருப்பார்கள். அவர்களை கைது செய்து விசாரணை நடத்த வேண்டும் என்று கூறியுள்ளார்.

சிறையில் இருந்த ரவுடி முட்டை கோபி சமீபத்தில் தான் ஜாமீனில் வெளியே வந்துள்ளான். அவனது நடவடிக்கை மற்றும் கூட்டாளிகளின் அடுத்த கட்ட திட்டம் பற்றி சரவணன் அவ்வப்போது போலீசுக்கு தகவல் தெரிவித்து வந்ததாக கூறப்படுகிறது.

இதையறிந்த ரவுடி கும்பல் அவரை பல முறை எச்சரித்துள்ளனர். இதற்கிடையே தான் சரவணனை ரவுடி முட்டை கோபி தரப்பினர் வீட்டில் இருந்து அழைத்து சென்று தீர்த்து கட்டி உள்ளனர். தற்போது முட்டை கோபி மற்றும் அவனது கூட்டாளிகள் தலைமறைவாகி விட்டனர். அவர்களை பிடிக்க தனிப்படை போலீசார் தீவிர விசாரணை நடத்தி வருகிறார்கள்.