எப்படி என்னுள் காதல் வந்தது…?

இளம் நடிகர்களில் இசைஞானமும், நல்ல குரல்வளமும்மிக்கவர் நடிகர் நகுலன். பாய்ஸ் படத்தில் அறிமுகப்படுத்தியபோது நகுலனின் குரல்வளத்தைக் கண்டு பாராட்டிய இயக்குநர் ஷங்கர், அப்படத்தில் ஒரு பாடலைப் பாட வாய்ப்பளித்தார். அடுத்து அன்னியன் படத்தை இயக்கியபோது அதில் இடம்பெற்ற காதல் யானை வருகிற ரெமோ என்ற பாடலை பாடும் வாய்ப்பையும் வழங்கினார். தொடர்ந்து ஹாரிஸ் ஜெயராஜ் இசையில் வேட்டையாடு விளையாடு படத்திலும் ஒரு பாடலைப்பாடினார் நகுலன். இந்நிலையில் தற்போது அவர் நடித்து வரும் கந்தகோட்டை படத்தில் ‘எப்படி என்னுள் காதல் வந்தது’ என்ற பாடலை சொந்தக்குரலில் பாடியிருக்கிறார்

கந்தகோட்டை படத்தில் நகுலன் சொந்தக்குரலில் பாடியது பற்றி அப்படத்தின் இயக்குநர் எஸ்.சக்திவேல் கூறியதாவது-

”நகுலனுக்கு வாய்ஸ் அற்புதமாக இருக்கும். கந்தகோட்டை படப்பிடிப்பின்போது அவர் பாடுவதைக் கேட்டிருக்கிறேன். விவேகா எழுதிய,

அவள் புருவத்தை சாய்த்ததும் பார்க்கவில்லை
புன்னகையில் ஒரு மாற்றமில்லை
கால்விரலால் நிலம் தோண்டவில்லை
கடந்த பின்னும் என்னைப் பார்க்கவுமில்லை
எப்படி என்னுள் காதல் வந்தது

- என்ற பாடலின் கம்போஸிங்கின்போது அந்தப்பாடலை ஹம் பண்ணினார் நகுலன். அவரது குரலில் அந்தப் பாடலைக் கேட்டபோது உயிரோட்டமாக இருப்பதுபோல் தோன்றியது. இசையமைப்பாளர் தினாவும் அப்படியே ஃபீல் பண்ணினார். எனவே அப்போதே நகுலனைப் பாட வைத்து ஒலிப்பதிவு செய்தோம். கந்தகோட்டை படத்தின் ஹைலைட்டாக இந்தப்பாடல் அமைந்திருக்கிறது. நியூஸிலாந்தில் படமாக்கி இருக்கிறோம்.” என்றார்.