அஜித்தின் ‘மங்காத்தா’ இப்போது ராதிகா சரத்குமாரிடம்!

கடந்த ஒன்றரை வருடங்களாக தயாராகி வரும் மங்காத்தா திரைப்படம் ஒருவழியாக வரும் ஆகஸ்ட் 31 அன்று திரைக்கு வர இருக்கிறது. படப்பிடிப்பு, பாடல் வெளியீடு போன்றவற்றில்தான் பிரச்சினை என்றால், படத்தினை விநியோகிப்பதிலும் பிரச்சினை ஏற்பட்டுள்ளது.

இப்படத்தினை முதலில் கிளவுட் நைன் மூவிஸ் வெளியிடுவதாக இருந்தது. பிறகு ஸ்டுடியோ கிரீன் நிறுவனம் வெளியிடுவதாக அறிவித்தார்கள். அதுவும் மாற்றப்பட்டு சன் பிக்சர்ஸ் வசம் கொடுக்கப்பட்டது.

வெளிநாடுகளில் திரையிடும் உரிமையை ஐங்கரன் பிலிம்ஸ் இண்டர்நேஷனலிடம் விற்று விட்டார்கள். இந்தியாவில் வெளி மாநிலங்களில் திரையிடும் உரிமையை சன் பிக்சர்ஸிடம் விற்று விட்டார்கள்.

தற்போது சன் பிக்சர்ஸிடமிருந்து, தமிழகம் முழுவதும் ‘மங்காத்தா’ படத்தை திரையிடும் உரிமையை, ராதிகா சரத்குமாரின் ‘ராடான்’ நிறுவனம் வாங்கியிருக்கிறது.

அஜித் நடிக்கும் 50-வது படம் ‘மங்காத்தா’ என்பதால் இப்படத்திற்கு அதிக எதிர்பார்ப்பு உருவாகி இருக்கிறது.