50 சாமியார்கள் நடித்த அரசியல் படம்!

ஒரு சாமியார் இல்லை இரண்டு சாமியார் இல்லை… 50 சாமியார்களை வைத்து முக்கிய காட்சி ஒன்றை படமாக்கி இருக்கிறார் ‘மை’ படத்தின் இயக்குனரான சே.ரா.கோபாலன். இப்படம் உள்ளாட்சி தேர்தலை மையமாக வைத்து எடுக்கப்பட்டு வருகிறது.

இப்படம் குறித்து அவர் கூறியதாவது;

“இப்படத்துக்காக ஜடாமுடியோடு கூடிய 50 சாமியார்கள் தேவைப்பட்டனர். வேலூர் பக்கம் வள்ளிமலையில் இருந்த சாமியார்களை அழைத்து வந்து நடிக்க வைத்தோம். ஷூட்டிங் முடிந்ததும் ஒவ்வொருவருக்கும் 300 ரூபாய் சம்பளம் கொடுக்கப்பட்டது.

மேயர், கவுன்சிலர் போன்ற மாநகராட்சி, உள்ளாட்சி தேர்தலை மையமாக வைத்து இந்த படம் உருவாகி இருக்கிறது. விஷ்ணுபிரியன் என்பவர் கதாநாயகனாக நடிக்கிறார். ஸ்வேதா பாசு கதாநாயகியாக நடிக்கிறார். உள்ளூர் பிரச்னைகளை மையமாக வைத்து நடக்கும் உள்ளாட்சி தேர்தலை வைத்துள்ளோம். விரலில் கறுப்பு மை வைத்து நடத்தும் தேர்தலால், சமுதாயத்தில் எவ்வளவு பெரிய மாற்றத்தை கொண்டு வர முடியும் என்பதை இப்படம் வலியுறுத்தும்.’’ என்றார்.