7 ஆம் அறிவு பாடல் வெளியீடு வரப்போகிறார் ஷாருக்கான்

வடக்கத்திய நடிகர்களுக்கு வாடிப்பட்டியிலும் கூட ரசிகர் மன்றம் திறப்பார்கள் போலிருக்கிறது. அந்தளவுக்கு குளோபல் உலகில் தொத்த இந்தியாவும் கட்டுண்டு கிடக்கிறது. இங்குள்ள இயக்குனர்கள் பாலிவுட்டில் முக்கிய இடத்தை பிடித்துக் கொண்டிருப்பதால் யார் அழைத்தாலும் தமிழ்நாட்டுக்கு விசிட் அடிக்க தயங்குவதில்லை பாலிவுட் ஹீரோக்கள்.

இந்த அழைப்பில் மனதை பறிகொடுத்திருக்கும் லேட்டஸ்ட் ஹீரோ ஷாருக்கான். கடந்த சில மாதங்களுக்கு முன்புதான் நடிகர் சல்மான்கான் சென்னைக்கு வந்து ஒரு பாடல் வெளியீட்டு விழாவில் கலந்து கொண்டார். (நிகழ்ச்சி நிரலில் குறிப்பிட்ட நேரத்திலிருந்து சுமார் நாலு மணி நேரம் லேட்டாக வந்தார் சல்லுபாய்) இதோ அவரது பாணியிலேயே சென்னைக்கு வரப்போகிறார் ஷாருக்கான். இவராவது குறித்த நேரத்தில் வந்தால் சந்தோஷம். அது போகட்டும்… யார் அழைப்பின் பேரில் வருகிறாராம்?

7 ஆம் அறிவு படத்தின் பாடல் வெளியீட்டு விழா சிங்கப்பூரில் நடக்கும், துபாயில் நடக்கும் என்றெல்லாம் முதலில் செய்தியை கிளப்பிய முருகதாஸ் யூனிட், கடைசியில் சென்னை டிரெட் சென்ட்டரிலியே விழாவை நடத்த முடிவு செய்திருக்கிறார்கள். இதில் கலந்து கொள்ளதான் வருகிறார் ஷாருக்கான். ஏ.ஆர்.முருகதாசுக்கு மும்பையிலும் நல்ல பெயர் இருப்பதால் அவர் அழைத்தவுடன் விழாவுக்கு வர சம்மதித்தாராம் ஷாருக்.

தமிழில் இப்படம் வெளியாகும் அதே நாளில் இப்படத்தை மும்பையிலும் திரையிட ஏற்பாடு செய்திருக்கிறாராம் முருகதாஸ். சுமார் பதினைந்து கோடிக்கு இந்தி ரைட்ஸ் விற்பனை ஆகியுள்ளதாம். படம் வெளியாகும்போது ஷாருக் இங்கு வந்து போன கிளிப்பிங்சை வைத்து விளம்பரம் செய்ய வசதியாக இருக்குமே என்பதால்தான் இந்த அழைப்பு.