கமல்ஹாசன் படத்தை 100 தடவை பார்த்தேன்! சாருஹாசன் பேச்சு!!

கமல்ஹாசனின் முதல் படத்தை தியேட்டர், தியேட்டராக போய், 100 தடவை பார்த்தேன் என்று நடிகர் சாருஹாசன் உருக்கமாக கூறினார். நடிகர் கமல்ஹாசன் கவுரவ வேடத்தில் நடித்துள்ள மலையாள படம், `4 ப்ரெண்ட்ஸ். சாஜி சுரேந்திரன் இயக்கியிருக்கும் இப்படத்தில் ஜெயராம், ஜெயசூர்யா, மீராஜாஸ்மின் உள்ளிட்டோரும் நடித்திருக்கிறார்கள். இது, புற்று நோயினால் பாதிக்கப்பட்ட 4 நண்பர்களை பற்றிய படம். உயிருக்கு கெடு வைக்கப்பட்ட அந்த 4 பேர்களின் கவலைகளை போக்கி, உற்சாகமூட்டுகிற வேடத்தில் கமல்ஹாசன் நடித்து இருக்கிறார். படத்தில் நடித்ததற்காக அவர் சம்பளம் எதுவும் பெற்றுக்கொள்ளவில்லை. சமூக கருத்துள்ள படம் என்பதால், இலவசமாக நடித்துக் கொடுத்துள்ளார்.

இந்த படத்தை, `அன்புள்ள கமல் என்ற பெயரில், தமிழில் மொழிமாற்றம் செய்து வெளியிடுகிறார் பிரதீப். படத்தின் பாடல்கள் வெளியீட்டு விழா, சென்னை ஏவி.எம். ஸ்டூடியோவில் நடந்தது. பாடல்களை, கமல்ஹாசனின் அண்ணன் நடிகர் சாருஹாசன் வெளியிட்டு பேசினார்.

அவர் பேசுகையில், `அன்புள்ள கமல் என்று பெயர் சூட்டப்பட்டுள்ள இந்த படவிழாவில் கலந்து கொள்ள எனக்கு அதிக உரிமை இருக்கிறது. கமல்ஹாசன் பிறப்பதற்கு முன்பே எனக்கு திருமணம் ஆகிவிட்டது. யாராவது 100 படங்களை பார்த்தவர்கள் இருக்கிறீர்களா? அல்லது ஒரே படத்தை 100 தடவை பார்த்தவர்கள் இருக்கிறீர்களா? நான் பார்த்து இருக்கிறேன். அது, கமல்ஹாசன் நடித்த முதல் படம், `களத்தூர் கண்ணம்மா. கமல்ஹாசனை குழந்தையாக தூக்கிக்கொண்டு தியேட்டர், தியேட்டராக போனேன். எல்லா தியேட்டர்களிலும் அந்த படத்தை பார்த்து கண்ணீர் விட்டேன். என் தம்பியை முதன்முதலாக திரையில் பார்த்தபோது, ஆனந்த கண்ணீர் விட்டேன், என்று உருக்கமாக கூறினார்.

நிகழ்ச்சியில், திரைப்பட வினியோகஸ்தர்கள் சங்க தலைவர் `கலைப்புலி ஜி.சேகரன், நடிகர்கள் விதார்த், ரவிகாந்த், இசையமைப்பாளர் ஜான், பூண்டி மாதா கோவில் பங்கு தந்தை அகஸ்டின் பீட்டர் உள்ளிட்டோர் கலந்துது கொண்டனர்.