வெற்றிமாறன் + சிம்பு + தயாநிதி !

‘ஆடுகளம்’ படத்தினை தொடர்ந்து வெற்றிமாறன் இயக்க இருக்கும் படம் ‘வட சென்னை’. இப்படத்தினை தயாநிதி அழகிரி தயாரிக்க இருக்கிறார்.

இப்படத்தில் யார் நடிக்க இருக்கிறார்கள் என்பது குறித்து பல்வேறு தகவல்கள் வெளியாகி வந்தன. அந்த தகவல்களுக்கு பதில் சொல்லும் வகையில் தயாநிதி அழகிரி நேற்று ( நவ 29 ) தனது டிவிட்டர் இணையத்தில் ‘வட சென்னை’யில் யார் எல்லாம் நடிக்க இருக்கிறார்கள் என்பது குறித்து நாளை அறிவிக்கிறேன் என்று கூறினார்.

இன்று தயாநிதி அழகிரி தனது டிவிட்டர் இணையத்தில் ” வட சென்னை படத்தின் நாயகனாக சிம்பு நடிக்க இருக்கிறார். தெலுங்கு மற்றும் இந்தியில் முன்னணி நடிகராக இருக்கும் ராணா இப்படத்தில் இரண்டாம் முக்கிய வேடத்தில் நடிக்க இருக்கிறார்.

ஆண்டரியாவை ஒரு கதாபாத்திரத்தில் நடிக்க ஒப்பந்தம் செய்து இருக்கிறோம். கேமராமேன் வேல்ராஜ், ஜி.வி.பிரகாஷ், எடிட்டர் கிஷோர், ஆர்ட் டைரக்டர் ஜாக்கி என பலரை ஒப்பந்தம் செய்து இருக்கிறோம்.

வட சென்னையில் நடக்கும் கதையே ‘வட சென்னை’. இப்படம் வரலாற்றுப் படம் அல்ல. மார்ச் 2012 முதல் படப்பிடிப்பு துவங்க இருக்கிறது ” என்று அறிவித்துள்ளார்.

வெற்றிமாறன் – தனுஷ் இணைந்த ‘ பொல்லாதவன் ‘, ‘ ஆடுகளம் ‘ ஆகிய இரண்டுமே வரவேற்பை பெற்ற படங்கள். ‘ஆடுகளம்’ படத்திற்காக இருவருமே தேசிய விருது வென்றனர். தற்போது வெற்றிமாறன் – சிம்பு இணைந்து இருக்கும் ‘வட சென்னை’ படத்திற்கு பெரும் எதிர்பார்ப்பு நிலவி இருக்கிறது.