மீண்டும் குத்தாட்டக் களத்தில் வேட்டையாடும் ரோஜா!

அரசியலில் நுழைந்தவுடன் நடிப்புக்கு முழுக்குப் போட்ட ரோஜா, தற்போது
நீண்ட இடைவெளிக்குப் பிறகு நடிக்க வந்திருக்கிறார். ‘வேட்டையாடு’ என்ற
படத்தில் இடம்பெறும் ஒரு பாடலுக்கு கழைக் கூத்தாடியாக நடனம்
ஆடியிருக்கிறார். இவருடன் பாண்டியராஜனும் இணைந்து நடனம் ஆடியிருக்கிறார்.
இந்தப் பாடல் கழைக் கூத்தாடிகளின் வாழ்க்கை வரலாற்றை சொல்லும் பாடலாக
அமைந்திருக்கிறது. ‘சௌந்தர்யன் பிக்சர்ஸ்’ சார்பில் விடியல் ராஜு
தயாரிக்கும் இப்படம், விறுவிறுப்பு மிக்க ஆக்ஷன் படமாகவும், அதே சமயம்
இன்றைய இளய சமுதாயத்திற்கு அறிவுரை சொல்லும் படமாகவும் இருக்குமாம்.


இப்படத்தின் கதை, திரைக்கதை, வசனம் எழுதி இயக்கும் கே.எஸ்.விஜயபாலன்,
இப்படத்தைப் பற்றி கூறும் போது, “பள்ளிப் படிப்பை முடித்து, கல்லூரி
செல்லும் இளம் காதல் ஜோடி, வீட்டு எதிர்ப்பை மீறி ஊரை விட்டு ஓடி,
குணசீலபுரம் என்ற காட்டுப் பகுதி கிராமத்தில் நுழைகிறார்கள். ஊர் பெரிய
மனிதரான மைனர் குணசீலனிடம் தஞ்சமடைகிறார்கள். ஊர் பெரிய மனிதர் போர்வையில்
இருக்கும் குணசீலன், காதல் ஜோடிகளைப் பிரித்து, கற்பழித்து, கொலை செய்வது
அங்குள்ள மர்மமான விஷயம். இந்த மர்மத்தை அறிந்துகொண்ட காதல் ஜோடி,
அங்கிருந்து தப்பிக்க முயற்சிக்கிறார்கள்.

அவர்கள் தப்பித்தார்களா அல்லது குணசீலனால் வேட்டையாடப் பட்டார்களா?
என்பதே இப்படத்தின் கதை. பெற்றவர்கள் பிள்ளைகளுக்கு சின்ன வயதிலிருந்தே
ஒவ்வொரு விஷயத்திலும் பார்த்துப் பார்த்து நல்லது செய்கிறார்கள்.
பொருத்தமான ஜோடியைத் தேர்வு செய்து திருமணம் செய்து வைக்க மாட்டார்களா?
படிப்பை விட்டுவிட்டு வீட்டை விட்டு ஓடி, எதிர்காலத்தைத் தொலைத்து
நிற்பவர்கள் நிலையை உணர்த்தும் விதமாகவும் இப்படத்தை இயக்கியிருக்கிறேன்.”
என்றார். இப்படத்தை தயாரிப்பதுடன், படத்தில் இடம்பெறும் முக்கியமான
கதாபாத்திரமான குணசீலன், பாத்திரத்தில் விடியல் ராஜு நடித்திருக்கிறார்.

இந்த கேரக்டரை வில்லனாக சித்தரித்தாலும், இவருடைய ஃபிளாஷ்பேக்
காட்சிகளில் கண் கலங்காதவர் எவரும் இருக்க முடியாதாம். கதையின் நாயகனாக
விடியல் ராஜு நடிக்க, அவருக்கு ஜோடியாக உதயதாரா நடிக்கிறார். இவர்களுடன்
புதுமுக ஹரி, அவருக்கு ஜோடியாக மான்ஸ் நடித்திருக்கிறார். இவர்களுடன்
பாண்டியராஜன், ரோஜா, தேவன், மனோபாலா, போஸ் வெங்கட், நெல்லை சிவா, காதல்
சுகுமார், லாவண்யா, மீரா கிருஷ்ணன், சபீதா ஆனந்த் என ஒரு பெரிய நட்சத்திரப்
பட்டாளமே நடித்திருக்கும் இப்படத்திற்கு செல்வா. ஆர் ஒளிப்பதிவு
செய்கிறார். எஸ்.பி.எல். செல்வதாசன் இசையமைக்க, அனில் மல்நாட் படத்தொகுப்பு
செய்கிறார்.

முதல் கட்ட படப்பிடிப்பை முடித்திருக்கும் ‘வேட்டையாடு’ படக்குழுவினர்
தற்போது கேரள காட்டுப் பகுதியில் இரண்டாம் கட்ட படப்பிடிப்பை நடத்தி
வருகிறார்கள்.