பாலிவுட்டில் கால் பதிக்கும் கே.வி ஆனந்த்

தமிழில் ‘காதல் தேசம்’ படத்தின் மூலம் ஒளிப்பதிவாளராக அறிமுகம் ஆனவர்
கே.வி ஆனந்த். தொடர்ந்து ஷங்கர் இயக்கத்தில் ரஜினி நடித்த ‘சிவாஜி’ உள்பட
பல முக்கிய படங்களில் ஒளிப்பதிவாளராக பணியாற்றினார். இரண்டு இந்திப்
படங்கள் உள்பட மொத்தம் 14 படங்களில் அவர் ஒளிப்பதிவாளராகப்
பணியாற்றியுள்ளார். இடையில் 2005ம் ஆண்டில் ஸ்ரீகாந்தை நாயகனாக வைத்து ‘கனா
கண்டேன்’ என்னும் படத்தை இயக்கியதன் மூலம் இயக்குனர் ஆனார் கே.வி. ஆனந்த்.
எனினும் 2009-ல் சூர்யாவை நாயகனாக வைத்து அவர் இயக்கிய ‘அயன்’ படம்,
கே.வி. ஆனந்தின் வாழ்வில் திருப்புமுனையை ஏற்படுத்தியது. ‘அயன்’ படத்தின்
வெற்றி கே.வி. ஆனந்தை முழுநேர இயக்குனர் ஆக்கியது. அதனைத் தொடர்ந்து ஜீவா
நடிப்பில் அவர் இயக்கிய ‘கோ’ படம் அவரை முன்னணி இயக்குனர்களில் ஒருவராக
ஆக்கியது.

‘கோ’ படத்திற்கு பின்னர், இரண்டாவது முறையாக சூர்யாவை நாயகனாக்கி, தலை
ஒட்டிப் பிறந்த இரட்டைக் குழந்தைகள் கதையை மையமாக வைத்து ‘மாற்றான்’ படத்தை
இயக்கி வருகிறார். ‘மாற்றான்’ படப்பிடிப்பு தற்போது இறுதிக்கட்டத்தை
எட்டியுள்ள நிலையில், ஆனந்த் அடுத்து இயக்கும் படம் பற்றி கோலிவுட்டில்
பெரும் எதிர்பார்ப்பு நிலவியது.

இந்நிலையில் தமிழில் இயக்குனராக வெற்றியடைந்த ஆனந்த், முதன்முறையாக
இந்திப் படம் இயக்க உள்ளார். இப்படத்தில் இந்தி திரையுலகின் முன்னணி நடிகர்
அக்‌ஷய் குமார் கதாநாயகனாக நடிக்கிறார். படத்திற்கான கதை விவாதம்
உள்ளிட்டவை முடிவடைந்த நிலையில், விரைவில் படப்பிடிப்பை தொடங்க உள்ளார்
கே.வி. ஆனந்த்.