59வது தேசிய விருதுகள்! அழகர்சாமியின் குதிரைக்கு தங்கத் தாமரை விருது வழங்கப்பட்டது!

டில்லியில் நடந்த 59வது தேசிய திரைப்பட விருதுகள் வழங்கும் விழாவில் அழகர்சாமியின் குதிரை படத்துக்கு தங்க தாமரை தேசிய விருது வழங்கப்பட்டது. விழாவில் துணை ஜனாதிபதி அமீது அன்சாரி கலந்து கொண்டு விருதுகளை வழங்கினார். தமிழில் சிறந்த ஜனரஞ்சக படமாக தேர்வான அழகர்சாமியின் குதிரை படத்துக்கு தங்க தாமரை விருது, மற்றும் ரூ.2 லட்சம் ரொக்கப் பரிசு வழங்கப்பட்டது. இதில் ஹீரோவாக நடித்த அப்பு குட்டி சிறந்த துணை நடிகருக்கான விருது பெற்றார். அவருக்கு வெள்ளி தாமரையும், ரூ.50 ஆயிரம் ரொக்கப்பரிசும் வழங்கப்பட்டது.

விமல், இனியா நடித்த வாகை சூடவா சிறந்த தமிழ் படத்துக்கான விருது பெற்றது. சிறந்த அறிமுக இயக்குநருக்கான விருது தமிழில் ஆரண்யாகான்டம் படத்தை இயக்கிய குமாரராஜா தியாகராஜனுக்கு கிடைத்தது. உமேஷ் குல்கர்னி இயக்கிய மராட்டிய படம் தியோல், பியாரி ஆகிய படங்கள் சிறந்த படங்களுக்கான தேசிய விருதை பகிர்ந்து கொண்டன. இந்த படங்களுக்கு தங்க தாமரையும், இரண்டரை லட்ச ரூபாய் பரிசும் வழங்கப்பட்டது. சில்க் ஸ்மிதா கதையான தி டர்ட்டி பிக்சர்ஸ் படத்தில் நடித்த வித்யாபாலனுக்கு சிறந்த நடிகை விருதும், தியோல் படத்தில் நடித்த கிரிஷ் குல்கர்னி சிறந்த நடிகருக்கான விருதும் பெற்றனர்.