75 லட்சம் சம்பளம் கேட்கிறார் கருணாஸ்!

காமெடி நடிகரான கருணாஸ் ஒரு படத்தில் கதையின் நாயகனாக நடிக்க ரூ. 75 லட்சம் கேட்கிறார் என்றால் நம்ப முடிகிறதா? ஆனால் நம்பித்தான் ஆக வேண்டும். தற்போது ஷக்தி சிதம்பரம் இயக்கத்தில் மச்சான் மற்றும் ரகளைபுரம், சந்தமாமா போன்ற படங்களில் நாயகனாக நடித்து வரும் கருணாஸ், மேலும் சில படங்களிலும் நாயகனாக நடிக்கும் முயற்சிகளில் ஈடுபட்டிருக்கிறார்.

இந்த நிலையில், அவர் நடித்துள்ள மச்சான் படம் 4.5 கோடிக்கு வியாபாரம் ஆகியுள்ளதாம். அதனால் அடுத்து ரகளபுரம் படத்தை 5 கோடிக்காவது விற்று விட வேண்டும் என்ற யோசனையில் இருக்கிறார் கருணாஸ். அதன்காரணமாக, ரகளபுரம் படத்திற்க்கு பிறகே மச்சான் படத்தை ரிலீஸ் செய்யப்போகிறார்களாம்.

இந்த சந்தர்ப்பத்தை பயன்படுத்தி, தனது படக்கூலியையும் தற்போது கன்னாபின்னாவென்று உயர்த்தியிருக்கிறார் கருணாஸ். அதாவது, புதிதாக தன்னிடம் யாராவது இயக்குனர்கள் கதை சொல்ல வந்தால், ரூ. 75 லட்சம் சம்பளம் தந்தால் மட்டுமே நான் நடிப்பேன் என்று அடித்து சொல்கிறார். அவரது இந்த தடாலடி சம்பள உயர்வின் காரணமாக, அவருக்காக கதை பண்ணி வைத்திருந்த இயக்குனர்கள் அதிருப்தியில் உள்ளனர். இதில் சிலர், மார்க்கெட்டில் பிசியாக நடித்து வரும் சத்யன், சிங்கம்புலி உள்ளிட்ட காமெடியன்களை நோக்கி செல்லவும் தொடங்கிவிட்டனர்.