சொட்ட வாளைக்குட்டியாக தனுஷ்

ஒரு வழியாக அதிகாரப்பூர்வ அறிவிப்பு வெளியாகிவிட்டது. களவாணி மற்றும் வாகை சூட வா புகழ் இயக்குநர் சர்குணம் அடுத்து இயக்க உள்ள படம் சொட்ட வாளைக்குட்டி. இப்படத்தில் கதாநாயகனாக தனுஷ் நடிக்கிறார்.

இப்படத்திற்கு பெயர் ஒரு முறை சொன்னால் புரியவில்லை என்று மறுபடியும் கேட்டோம். ஒரு வேளை நாம்தான் தவறாக புரிந்து கொண்டோமோ என்று.

இரண்டாவது முறை கேட்டதுமே சர்குணமே புரிந்து கொண்டார். படத்தின் பெயர் நமக்குப் புரியவில்லை என்று. எனவே அவர் அந்த பெயர் குறித்து விளக்கம் அளித்தார். "பொதுவாக கிராமங்களில் இந்த வார்த்தையை பயன்படுத்தவார்கள். குறிப்பாக தஞ்சாவூர் அருகே உள்ள எங்கள் பூர்வீக கிராமங்களில் மிகவும் அதிகமாகப் பேசப்படும் வார்த்தை இது. சொட்ட வாளைக்குட்டி என்றால், அழகான, அறிவான, ஆணழகன் என்று அர்த்தம்" என்றார்.

மேலும், "இப்படத்தின் கதை மற்றும் பெயரைக் கேட்டதுமே தனுஷுக்கு மிகவும் பிடித்துப்போய்விட்டது. இந்த கதையின் நாயகன் கதாப்பாத்திரத்துக்கு தனுஷ் மிகச் சிறப்பாக பொருந்துவார். உண்மையில் சொல்ல வேண்டும் என்றால், களவாணி மற்றும் வாகை சூட வா படக் கதைகளே இவரை மனதில் வைத்துக் கொண்டு உருவானதுதான். ஆனால் அந்தப் படங்களில் எங்களால் இணைய முடியாமல் போய்விட்டது" என்று ஒரு தகவலையும் தூக்கிப்போட்டார்.

படப்பிடிப்பு விரைவில் துவங்க உள்ளதாம்.