தயாரிப்பாளர் ஏவி.எம்.முருகன் மரணம்

சென்னை, செப். 10: பிரபல திரைப்படத் தயாரிப்பாளர் ஏவி.எம்.முருகன் (78) திங்கள்கிழமை காலை சென்னையில் மரணமடைந்தார். திடீரென ஏற்பட்ட மாரடைப்பு காரணமாக அவர் உயிரிழந்தார் எனத் தெரிவிக்கப்பட்டது.

ஏவி.எம். ஸ்டுடியோவில் வைக்கப்பட்டிருந்த முருகனின் உடலுக்கு திரைத் துறையினர் மற்றும் பொதுமக்கள் அஞ்சலி செலுத்தினர்.

அவரது இறுதிச் சடங்கு, ஏவி.எம். ஸ்டுடியோ அருகில் உள்ள மின் மயானத்தில் செவ்வாய்க்கிழமை நடைபெறுகிறது.

ஏவிஎம். திரைப்பட தயாரிப்பு நிறுவனத்தின் ஸ்தாபகர் ஏ.வி.மெய்யப்ப செட்டியாரின் மூத்த மகனான முருகன், சென்னை வளசரவாக்கத்தில் குடும்பத்தினருடன் வசித்து வந்தார்.

ஏவி.எம். நிறுவனம் வெளியிட்ட ஏராளமான படங்களில் தயாரிப்புப் பணிகளில் ஈடுபட்டவர். அந்த நிறுவனம் தயாரித்த "பூஜா' என்ற தெலுங்குப் படத்தை இயக்கியிருக்கிறார்.

பின்னர், தந்தை உயிருடன் இருந்தபோதே அவர் தனியாகப் பிரிந்து தயாரிப்பு, இதர சினிமா பணிகளில் ஈடுபட்டார். "வாதனிமல்லி' என்ற தெலுங்குப் படத்தைத் தயாரித்து இயக்கியதோடு அந்தப் படத்தில் நடிக்கவும் செய்திருந்தார்.

ஏவி.எம். நிறுவனத்தின் பழைய கருப்பு-வெள்ளைப் பட லேப் இவரது பொறுப்பில் இருந்தது. தயாரிப்பாளர் சங்கத்தை உருவாக்கியவர்களில் முக்கியமானவர். "துணை தேடும் நெஞ்சம்', "தர்ம பாதை' உள்பட சில பக்தி நூல்களை எழுதியுள்ளார்.

தென்னிந்திய நடிகர் சங்கம், திரைப்பட வர்த்தக சபை, தமிழ்த் திரைப்படத் தயாரிப்பாளர்கள் சங்கம், தென்னிந்தியத் திரைப்பட தொழிலாளர் சம்மேளனம் ஆகியவற்றுக்கு நடைபெற்ற தேர்தல்களில் தேர்தல் அதிகாரியாகப் பொறுப்பேற்று திறம்பட செயல்பட்டவர்.

தயாரிப்பாளர்கள் ஏவி.எம்.சரவணன், ஏவி.எம்.குமரன், ஏவி.எம்.பாலசுப்பிரமணியன் ஆகியோர் இவரது இளைய சகோதரர்கள்.