பஸ்ஸில் பெண்ணுக்கு ஆபாசப் படம் காட்டியவருக்கு ஒன்றரை வருட சிறை

கொள்ளுப்பிட்டியில் பஸ்ஸில் பயணம் செய்துகொண்டிருந்த பெண்ணொருவருக்கு
செல்லிடத் தொலைபேசி மூலம் ஆபாச படம் காட்டிய குற்றச்சாட்டை ஒப்புக்கொண்ட
இளைஞர் ஒருவருக்கு, கொழும்பு கோட்டை நீதவான் ஒன்றரை வருட கடூழிய
சிறைத்தண்டனை விதித்தார்.

மேற்படி சம்பவம் குறித்து பஸ் நடத்துநருக்கும் சாரதிக்கும் அப்பெண்
அறிவித்ததயைடுத்து சந்தேக நபர் கொள்ளுபிட்டி பொலிஸ் நிலையத்திற்கு கொண்டு
செல்லப்பட்டிருந்தமை குறிப்பிடத்தக்கது.

இது தொடர்பான வழக்கு நேற்று வியாழக்கிழமை விசாரணைக்கு வந்தபோது,
குற்றம்சுமத்தப்பட்ட நபரின் முந்தைய குற்றச்செயல்கள் தொடர்பான கைரேகைப்
பதிவுகளையும் பொலிஸார் நீதிமன்றில் சமர்ப்பித்தனர்.

குற்றம்சுமத்தப்பட்ட பத்ம சிறிலால் எனும் நபர் ஏற்கெனவே இதேபோன்ற
குற்றத்திற்காக நீர்கொழும்பு நீதிமன்றமொன்றினால் ஒரு வருட கால
ஒத்திவைக்கப்பட்ட சிறைத்தண்டனை விதிக்கப்பட்டமை தெரியவந்தது.

அதையடுத்து குற்றவாளியாக காணப்பட்ட இந்நபருக்கு ஒன்றரை வருட
சிறைத்தண்டனையும் 1500 ரூபா அபராதமும் விதித்து நீதவான் லங்கா ஜயரட்ன
தீர்ப்பளித்தார்.