நடிகரின் மனைவி என்பதில் பெருமை இல்லை : பிரியங்கா திரிவேதி

பிரபல நடிகரின் மனைவி என்பதில் பெருமை இல்லை’ என்றார் பிரியங்கா திரிவேதி. ‘ராஜ்ஜியம்’, ‘காதல் சடுகுடு’, ‘ராஜா’, ‘ஐஸ்’, ‘ஜனனம்’ உள்ளிட்ட படங்களில் நடித்திருப்பவர் பிரியங்கா திரிவேதி. இவர் பிரபல கன்னட நடிகர் உபேந்திராவை மணந்தார். அதன்பிறகும் தொடர்ந்து படங்களில் நடித்து வருகிறார். இதுபற்றி அவர் கூறியதாவது சூப்பர் ஸ்டார் மனைவியானது சந்தோஷம். அவருடன் வாழும் ஒவ்வொரு நொடியையும் மகிழ்ச்சியுடன் அனுபவிக்கிறேன். அதேநேரம் அவருக்கு சமமாக என்னுடைய அடையாளத்தை வெளிக்காட்டுவது என்பது கடினம்.

உபேந்திராவை மணப்பதற்கு முன் என்னை நடிகையாக அடையாளம் கண்டுகொண்டிருந்தார்கள். இப்போது நடிகையாக என்னை அடையாளம் காட்டிக்கொள்வது சவாலாக உள்ளது. பிரபல நடிகரின் மனைவி என்று மட்டும் என்னை சொல்லாமல் நடிகை என்ற அடையாளத்தை மீண்டும் சம்பாதிக்க எண்ணுகிறேன். நாங்கள் இருவரும் ரொம்பவும் வித்தியாசமானவர்கள். அதுதான் எங்கள் வாழ்க்கையை இனிமையாக்கி இருக்கிறது. உபேந்திரா தொழில் பக்தி நிறைந்தவர். வேலையை தவிர வேறு எதிலும் அவர் அதிக கவனம் செலுத்த மாட்டார். நடிப்புதான் அவர் மனம் முழுவதும் நிரம்பி இருக்கும். அதன்பிறகு அவர் வாழ்வில் நான் முழுமையாக நிரம்பி இருக்கிறேன்.