சமந்தாவை காப்பியடிக்க மாட்டேன்

சென்னை : தெலுங்கில் ஜூனியர் என்.டி.ஆர்., காஜல் அகர்வால், சமந்தா நடிப்பில் ரிலீசான ‘பிருந்தாவனம்’, கன்னடத்தில் ரீமேக் ஆகிறது. மாதேஷ் இயக்குகிறார். தர்ஷன் ஹீரோ. காஜல் அகர்வால் வேடத்தில் கார்த்திகா, சமந்தா கேரக்டரில் பானு நடிக்கின்றனர். இதுகுறித்து அவர் கூறியதாவது: கர்நாடகாவில் மலையாள நடிகைகளுக்கு நல்ல வரவேற்பு இருக்கிறது. ‘பிருந்தாவனம்’ ரீமேக் மூலம் கன்னடத்தில் அறிமுகமாகிறேன். கன்னடம் பேசத் தெரியாது. விரைவில் கற்றுக்கொள்வேன்.

‘பிருந்தாவனம்’ பார்த்தேன். சமந்தா வேடத்தில் நடிப்பதால், ரீமேக்கில் அவரை காப்பியடித்து நடிக்கக் கூடாது என்பதில் உறுதியாக இருக்கிறேன். முதலில் இந்த கேரக்டரில் வேதிகா ஒப்பந்தமானார் என்று தெரியும். அவர் ஏன் நடிக்கவில்லை என்று தெரியாது. அது எனக்கு அவசியமும் இல்லை. இதுவரை என்னை புடவையில் மட்டுமே பார்த்த ரசிகர்கள், இப்படத்தில் மாடர்ன் உடையில் கிளாமராக பார்ப்பார்கள். தமிழில் ‘மூன்று பேர் மூன்று காதல்’, ‘வாய்மை’, மலையாளத்தில் ‘இம்மானுவேல்’, ‘ஜிஞ்சர்’ படங்களில் நடிக்கிறேன்.