அமெரிக்காவில் அதிகரிக்கும் பாலியல் குற்றங்கள்

அமெரிக்கா முழுவதும் பாலியல் தொடர்பான குற்றங்களைப் புரிந்தவர்களின் எண்ணிக்கை 3 லட்சத்து 74 ஆயிரத்து 270 பேர் என்று சமீபத்திய ஆய்வு ஒன்று தெரிவிக்கிறது.

பாலியல் தொடர்பான குற்றங்கள் அங்கு அதிகரித்து வருவதையே இது காட்டுகிறது.

இதற்காக அமெரிக்காவில் பாலியல் குற்றவாளிகள் என்று அடையாளம் காணப்பட்டவர்களின் முகவரி உள்ளிட்டவை அடங்கிய சேவையை தனியார் நிறுவனம் ஒன்று வழங்குகிறது. இதன்மூலம், நாம் வாழும் பகுதிக்கு அருகில் பாலியல் குற்றங்களை புரிவோர் என்று கருதப்படுவோர் யாரேனும் இருக்கிறார்களா என்பதை உறுதி செய்து கொள்ள முடியும் என்று அந்நிறுவனம் விளம்பரப்படுத்தியுள்ளது.

இதற்காக மென்பொருள் சேவையை தேடுதல் வசதியுடன் அந்நிறுவனம் உருவாக்கியுள்ளது. பதிவாகியுள்ள சுமார் 50 ஆயிரத்திற்கும் மேற்பட்ட பாலியல் குற்றவாளிகள் பற்றிய விவரங்கள் அந்தத் தேடுதல் எந்திரத்தில் இடம்பெற்று இருக்கும். இதன்மூலம் நாம் வாழும் பகுதியில் பாலியல் குற்றவாளிகள் யாரேனும் உள்ளனரா என்பதை அறிந்து கொள்ள முடியும். அவர்களின் புகைப்படங்களும் இடம்பெற்றிருப்பதால், எளிதில் நாம் அடையாளம் காண முடியும்.

இணையதளத்தில் இடம்பெறாத குற்றவாளிகள் பற்றி அறிந்து கொள்ள வேண்டுமானால், அருகில் உள்ள காவல்நிலையத்தை அணுகி தெரிந்து கொள்ளலாம். தவிர அந்நிறுவனம் அவ்வப்போது மின்னஞ்சல் மூலமாக புதிய குற்றவாளிகள் பற்றிய முன்னெச்சரிக்கையையும் வெளியிடுகிறது.